Link açıqlığı

Saatnıñ esas haberi

Çubarov: Qırımnı işğalden azat etmek içün Rusiyege qarşı sanktsiyalarnı daa qattı yapmaq kerek


Refat Çubarov
Refat Çubarov

Qırımtatar Milliy Meclisiniñ reisi, Ukraina Yuqarı Radası deputatı Refat Çubarov Rusiyege qarşı sanktsiyalarnı daa qattı yapmaq kerek olğanını saya. Onıñ fikrince, ameldeki sanktsiyalar «Moskvanı işğal etilgen Qırımnı azat ettirip olamay».

«Ameldeki sanktsiyalar tek Putinniñ Ukrainağa qarşı yañı arbiy faaliyetni alıp barmasını toqtata bile (şimdilik!), amma Moskvanı Rusiye tarafından işğal etilgen Qırımnı ve onıñ tarafından nezaret etilgen Donetsk ve Lugansk vilâyetleriniñ bazı rayonlarını azat etip halqara uquq sıñırlarına qaytarmaq içün iç te yeterli degil», – dep yazdı Çubarov Facebook saifesinde.

Onıñ qayd etkenine köre, iyün 6-da Ukraina prezidenti Petro Poroşenko, Frenkistan prezidenti Fransua Olland ve Almaniya kantsleri Angela Merkel arasındaki telefon lafı neticesinde belgilengen Rusiyege qarşı sanktsiyalarnı «Minsk añlaşmalarınıñ bütünley ömürge keçirilmesine qadar» devam ettirmesi aqqında noqta-i nazar «qırımtatar halqını nevbetteki zorbalıq ve repressiyalardan iç te saqlamaz».

«Demek ki, Rusiyege qarşı yañı, daa qattı halqara sanktsiyalar aqqında añlaşmalarnıñ olmaması Qırımnı işğalden azat etmesini yaqınlaştırmay. Vaqıt, Putinniñ esas resursı ola, onıñ yardımı ile o er kesni bezdirecek ola...», – dedi Çubarov.

Ukrain ve halqara uquq qoruyıcı teşkilâtları Qırım Rusiye tarafından işğal etilgen soñ yarımadada insan aqları bozulğanı aqqında ilân ete edi. Rusiye ükümeti tarafından eñ büyük basqın qırımtatarlar ve yarımadada yaşağan ukrain tarafını tutqanlarğa qarşı yapıla.

Rusiyege boysunğan Qırım ükümeti uquq qoruyıcılarnıñ yarımadada insan aqları bozulması aqqında malümat qabartılğan, dep ayta.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG