İşğal etilgen Qırımda yaqalanğan qırımtatarlarnıñ sayısı artacaq, dep belley Meclis reisi Refat Çubarov.
Bu aqta o, «Ukrinform» agentligine bergen izaatında bildirdi.
Onıñ fikrince, rusiyeli ükümet yaqalanğan qırımtatarlarnı ve «Hizb ut-Tahrir» teşkilâtını ekstremizmde qabaatlaycaq, «ğarpqa Qırımda yapqan areketleriniñ yañı gibrid şeklini satmaq» ve aynı vaqıtta Qırım sakinlerini qorquzmaq içün tamır halqına qarşı kösterici protsess yapacaq.
«Çeşit mustaqil, bu cümleden halqara menbalardan elde etkenimiz malümatlarğa köre, işğalciler sanki ekstremistik sayılğan «Hizb ut-Tahrir» teşkilâtınen bağlı olğanıñda qabaatlanıp yaqalanğan kişilerniñ sayısını arttıracaq.
Ve mında Qırımda «Hizb ut-Tahrir» teşkilâtınen bağlı o qadar insan olmağanı farq etmez. Böyle «Hizb ut-Tahrir» ekstremistik degen teşkilâtı yoq. Amma işğalciler bunı, kerekli qadar adamlarnı toplap, belki, bu 30-35 insan olacaq, şou-protsess yapmaq içün, ğarpqa olar, böyle etip, qırımtatarlarğa, musulmanlarğa qarşı degil de, musulman ekstremistlerine qarşı çalışqanını kösterip, aldatmaq içün mahsus yapa», – dep ayttı Çubarov.
Onıñ zan etkenine köre, Qırım sakinlerine qarşı repressiyalarnı daa qattı şekilde alıp barıp, Rusiye Ğarpqa ukrain Qırımda bulunğanını añlatmağa tırışa.
«Olar Ğarpqa Qırımda yapqan areketleriniñ yañı gibrid şeklini satmağa tırışacaq. Derken, siz bizni tenqit etesiñiz, ne içün sanktsiyalarnı qullanasıñız: biz mında ekstremistlernen küreşemiz, Süriyede siz ve biz beraber küreşkenimiz kibi», – dep añlattı Meclis reisi.
Tünevin Qırımda rusiyeli uquq qoruyıcılar kene de qırımtatarnı yaqaladı, onıñ evinde yasaq edebiyatnı qıdırdı ve onıñ «Hizb ut-Tahrir» teşkilâtı ile bağınen meraqlandı. Bundan soñ, Qırımtatar Milliy Meclisi reisiniñ birinci muavini Nariman Celâlnıñ malümatına köre, aqay kişini çıqmamaq şartınen yiberdiler.
Qırımda «Hizb ut-Tahrir» teşkilâtınen bağlı olğanında qabaatlanğan endi 12 Qırım musulmanı apiste buluna.
Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
