Qırım ve Sevastopol musulmanları diniy idaresi (QMDİ) mayıs 24-te ğayıp olğan Bağçasaray sakini Ervin İbragimovnıñ taqdirini qasevtlengenini bildirgen beyanatnı taqdim etti.
QMDİ matbuat hızmetiniñ bildirgenine köre, Qırım müftisi hacı Emirali Ablayev Kremlge boysunğan Qırım ükümetiniñ yolbaşçısı Sergey Aksönovğa ve uquq qoruyıcı organlarına Ervin İbragimovnı tapmaq içün bütün imkânlarnı qullanmaq muracaatınen bulundı.
«Müftiyat bu meseleni nezaret astında tuta», – dep aytıla bryanatta.
Bundan da ğayrı, Qırım ve Sevastopol musulmanları diniy idaresi bu vaqia boyunca er angi malümatnı elde etkenlerni bunı QMDİ-ge bildirmege çağırdı.
Devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov mayıs 24-te gece hırsızlandı, onıñ maşnası yol ortasında qaldırılğan tapıldı.
Bundan soñ internette video peyda oldı, videoda Ervin İbragimovnı, tahminlerge köre, Yol patrul hızmetiniñ hadimleri toqtadı, soñra onı mikroavtobusqa oturtmağa tırıştılar, o qaçmağa tırıştı, amma onı tuttılar ve maşnağa oturttılar. Bundan soñ maşna Bağçasaray suv anbarı tarafına, ormandan keçip ketti.
Rusiye Taqiqat komitetiniñ Qırım idaresi Bağçasarayda ğayıp olğan Ervin İbragimovnı qıdırmağa başladı.
Mayıs 24-te Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.
Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
