Link açıqlığı

QMDİ Qırımdan hac seferini teşkil etmek içün onıñ «yekâne aqqı» olğanını ilân etti


Emirali Ablayev, arhiv fotoresimi

Qırım ve Sevastopol musulmanları diniy idaresi (QMDİ) yarımadada «hac seferini teşkil etmek içün onıñ yekâne aqqı» olğanını ilân etti. Böyle qarar iyün 2-de Aqmescitte keçirilgen Hac-missiyanıñ toplaşuvında alındı, dep bildire QMDİ matbuat hızmeti.

İyün 2-de Aqmescitte keçirilgen «Rusiye musulmanları içün hac seferiniñ teşkil etilüvi: keçken ve kelecek zaman. İslâm terrorizmge qarşı» mevzulı konferentsiyada Qırım müftisi hacı Emirali Ablayev Hac-missiya eyyetiniñ azalarına Qırım territoriyasında musulmanlar içün hac seferini teşkil etmek aqqını Qırım ve Sevastopol musulmanları diniy idaresine belgilemek teklifinen bulundı.

Müftiniñ fikrince, bu «musulmanlarğa aldanmaqtan qaçınmağa yardım etecektir».

«Hac seferi teşkilâtçısı acılarnıñ ömrü, sağlığı ve havfsızlığı içün bütün mesüliyetni boynuna ala», – dep qayd etti Emirali Ablayev.

Rusiye Federal meclisiniñ Federatsiya şurası reisiniñ muavini, Rusiye Federatsiyası hac meseleleri boyunca vekâletlisi İlyas Magomed-Salamoviç Umahanov Qırım müftisiniñ teklifiniñ protokolğa kirsetilecegini qayd etti: Qırımda acılıq seferi teşkil etilmesi içün mesüliyetli QMDİ ola, hac-operatorı ise, «Muslim-Tur» şirketidir.

2015 senesi, QMDİ malümatına köre, Qırımdan 322 insan acılıqqa barıp keldi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG