Link açıqlığı

Saatnıñ esas haberi

Rusiyede mahkeme dört Qırım musulmanına qabaatlav neticesini oqudı – adliyeci


İyün 1-de Şimaliy Kavkaz okrug arbiy mahkemesi (ŞKOAM) Rostov-na-Donu şeerinde «Hizb ut-Tahrir» teşkilâtı ile bağlı olğanında qabaatlanğan dört Qırım musulmanına qarşı cinaiy işni baqmağa başladı. Adliyeci Emil Kurbedinovnıñ bildirgenine köre, toplaşuvda prokuror qabaatlav neticesini oqudı.

«Prokuror qabaatlav neticesini oqudı, qattı iş cedveli belgilendi. İyün ayınıñ soñuna qadar aman-aman bütün iş künleri adliyeciler Rostov-na-Donu şeerinde bulunmaq kerek. Şaatlar Aqyarda bulunıp, video konferentsiyası rejiminde sorğuğa çekilecek», – dep yazdı Kurbedinov Facebook saifesinde.

Onıñ sözlerine köre, toplaşuvda ukrain konsullığınıñ temsilcileri, Rusiye kütleviy haber vastalarınıñ temsilcileri bulundı.

Bundan da ğayrı, Emil Kurbedinovnıñ qayd etkenine köre, qırımlılarnıñ narazılığına baqmadan, dört Aqyar sakininiñ er birine Rusiye mahkemesi öz tarafından adliyecini belgiledi.

«Mahkeme tarafından Rostovdan dört adliyeci tayinlendi, qabaatlanğanlar olarnıñ iştiragine narazılıq bildirdi, çünki er biriniñ añlaşma boyunca öz adliyecisi bar, amma buna baqmadan, mahkeme tayinlegen adliyecilerni qaldırdı», – dep ayttı Kurbedinov.

Adliyeciniñ añlatqanına köre, onıñ tarafından imaye etilgen qabaatlanğanlar olarnıñ aqları bozulğanı aqqında ilân ettiler: «olarnı mahkeme zalına kelepçenen (naruçniki) kirseteler ve çıqaralar, bunen beraber olarnı belde qıyışqan alda tutalar».

Mahkemeniñ bu bildirmelerge reaktsiyası belli degil.

Ferat Sayfullayev, Nuri (Yuriy) Primov, Rustem Vaitov, Ruslan Zeytullayev 2015 senesi qışta Aqyarda yaqalandı.

Taqiqatnıñ noqta-i nazarına binaen, olar «Hizb ut-Tahrir» teşkilâtınıñ iştirakçileri ola. Aqyar musulmanları yaqalanğanından bir yıl soñra Qırımnıñ cenübiy tarafında da bu kibi vaqia yüz berdi. 2016 senesi fevral 11 ve 12 künleri rusiyeli uquq qoruyıcılar islâm dinini kütkenlerniñ evlerinde tintüv keçirdi ve insanlarnı yaqaladı. Umumen olaraq 14 adam yaqalandı.

«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG