Link açıqlığı

Saatnıñ esas haberi

Meclisniñ yasaq etilmesine qarşı şikâyet arizası baqılacaq kün daa belgilenmedi – adliyeci


Qırımtatar Milliy Meclisini yasaq etüvi ve onı esktremistik teşkilâtı olaraq tanıması aqqındaki qararğa qarşı şikâyet arizası Rusiye Yuqarı mahkemesi tarafından baqılacaq künü alâ daa belli degil. Bu aqta Qırım.Aqiqatqa mahkemede Meclisniñ menfaatını temsil etken adliyeci Cemil Temişev bildirdi.

«Daa belli degil. (Appelâtsiya – QA) mayıs 25-te berildi. Bunıñ içün (tarih belgilenmesini – QA) aytmağa daa ertedir», – dep ayttı Temişev.

Bundan evel Ukraina adliye naziri Pavlo Petrenko Ukraina, işğal etilgen Qırımda mahkemeniñ Qırımtatar Milliy Meclisiniñ faaliyetini yasaq etmek qararından sebep, Rusiye Federatsiyasına qarşı İnsan aqları Avropa mahkemesine dava azırlağanını ilân etti.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Halqara toplulıq Rusiye ükümetiniñ Meclis faaliyetini yasaq etmek qararını takbih etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG