Ukraina işğal etilgen Qırımda mahkemeniñ Qırımtatar Milliy Meclisi faaliyetini yasaq etmek qararından sebep Rusiye Federatsiyasına qarşı İnsan aqları Avropa mahkemesine dava azırlay.
Bunı mayıs 19-da Kyivde Ukraina adalet naziri Pavlo Petrenko bildirdi.
«Meclis etrafından olğan adise-vaqialarğa esaslanıp, Rusiye akimiyeti tarafından Meclis yasaqlanması aqqında «Ukraina Rusiyege qarşı» devletlerara ariza leyhasını azırladıq. Bu beşinci arizadır, İnsan aqları Avropa mahkemesinde beşinci devletlerara iştir», – dedi o.
Petrenkonıñ aytqanına köre, Adalet nazirligi Ukraina ükümetine ceza alacaq insanlar cedveline Meclis yasaqlanmasına alâqası olğanlarnı da qoşmağa teklif etecek. Onıñ qayd etkenine köre, Ukraina bu insanlarnıñ halqara ceza cedveline kirsetilmesini talap etecek.
Aprel 26-da Rusiye kontrol etken Qırım Yuqarı mahkemesi işğal etilgen yarımadada Qırımtatar Milliy Meclisiniñ faaliyetini yasaq etti. Qarardan bir ay içinde şikâyet etile bile.
Dünya toplulığı Rusiye akimiyetiniñ Meclisni yasaq etmek qararını sert bir şekilde takbih etti.
Meclis faaliyetiniñ yasaqlanmasından şikâyet etecek.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
