Link açıqlığı

Mühbir Lilâ Bucurova oña mayıs 30-da Rusiyege boysunğan Aqmescit prokuraturası temsilcileri bergen ekstremistik faaliyetiniñ mümkün olmaması aqqında tenbi vesiqasını Facebook saifesinde paylaştı.

Bucurovanıñ añlatqanına köre, nezaret müessisesiniñ hadimleri ziyaretiniñ sebebi onıñ içtimaiy ağlarda paylaşqan balalar aqqındaki beyanatı oldı.

«Balalarğa yardım etmege çağıruv – bu ekstremizm sayıla, eken. Bugün Aqmescit prokuraturasınıñ hadimleri maña nevbetteki «Ekstremistik faaliyetine qarşılıq boyunca qanunlarnıñ ve kütleviy haber vastaları qanunlarınıñ bozulması mümkün olmağanı aqqında tenbi vesiqasını» berdi. Bu «cinayetler» Facebook saifesinde yerleştirilgen beyanatlarımda, bundan da ğayrı Crimeantatars.club saytındaki «Endi bu bizim balalarımızdır» blogında tapıldı», – dep izaat berdi Lilâ Bucurova.

Bundan evel Bucurovağa mütenasip vesiqa berilgeni aqqında Qırımtatar Milliy Meclisiniñ reisi Refat Çubarov bildirgen edi.

Bir qaç kün evel Bucurova yarımada apishanelerinde bulunğan 18 Qırım musulmanınıñ balaları yardım ve destekke muhtac olğanı aqqında Facebook saifesinde yazdı. O, apiste bulunğanlarnıñ evlerinde çağına yetmegen kiçik balaları qalğanını qayd etti.

Bucurova, bu balalarğa daimiy şekilde yardım etmek içün teşebbüs gruppasını teşkil etmek, ya da «Mabüslerniñ balalarına yardım fondu aqqında tüşünmek mantıqlı olğanını» qayd etti ve istegenlerni balalarğa yardım etmek içün birleşmege çağırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG