Yarımadadaki apishanelerinde bulunğan 18 Qırım musulmanınıñ balaları yardım ve destekke muhtac. Bu aqta Qırım mühbiri Lilâ Bucurova mayıs 24-te, salı künü Facebook saifesinde bildirdi.
Bucurova şimdiki vaqıtta apiste bulunğanlarnıñ çoqusınıñ evde kiçik balaları qalğanını hatırlattı.
«Musulman qorantaları, esasen, patriarhal ola (yaqalanğanlarnıñ çoqusı ise dinni kütken musulmanlardır). Demek, böyle qorantada qadın aqça qazanmay, çünki onıñ işi aqayını, balalarını, büyük soy-soplarını ve evini baqmaqtır. Qorantanı baqmaq ise, aqaynıñ borcudır. Endi bu qorantanı baqqan aqaynı ailesinden ayırıp, apiske qapattılar. Yaqalanğanlarnıñ balaları nasıl yaşaycaq? Olar ne aşaycaq ve kiyecek? Olarnıñ oyuncaqları, qanfetleri, qış urbası ve mektep çantası olacaqmı?» – dep yazdı Qırım mühbiri Lilâ Bucurova.
Onıñ aytqan sözlerine binaen, 2015 senesi qışta Aqyarda yaqalanğan Ruslan Zeytullayevniñ üç balası, Rustem Vaitovnıñ bir hasta balası, Nuri Primovnıñ bir balası, Ferat Sayfullayevniñ üç balası bar.
«Fevral 26 işi» boyunca yaqalanğan Ali Asanovnıñ dört balası bar (soñki bala babası endi apiste bulunğan vaqıtta doğdı), Ahtem Çiygoznıñ bir çağına yetmegen balası bar.
2016 senesi fevral 11-de yaqalanğan Emir-Usein Kukunıñ eki balası, Vadim Siruknıñ bir balası ve ağırayaqlı apayı, Enver Bekirovnıñ üç balası, Muslim Aliyevniñ dört balası bar. Aprel 17-de yaqalanğan Arsen Cepparovnıñ bir balası bar. Mayıs 12-de yaqalanğan Enver Mamutovnıñ yedi balası (eñ kiçik qızı daa 2 ay toldurmadı), Rustem Abeltarovnıñ dört balası, Remzi Memetovnıñ eki balası, Zevri Abseitovnıñ dört balası bar.
«Qırımtatarlar iç bir vaqıt balanı belâğa qaldırmay edi. Halqımız içün yabancı balalar yoqtır. Endi olarnıñ episi bizim balalarımızdır. Ve bizim umumiy milliy, musulmanlarnıñ borcumız, olarnıñ babaları böyle imkândan marum olğan vaqıtta, olarğa ösmege ve ayaqqa turmağa yardım etmektir», – dep qayd etti Lilâ Bucurova.
Bucurova, bu balalarğa daimiy şekilde yardım etmek içün teşebbüs gruppasını teşkil etmek, ya da «Mabüslerniñ balalarına yardım fondu aqqında tüşünmek mantıqlı olğanını» qayd etti ve istegenlerni balalarğa yardım etmek içün birleşmege çağırdı.
Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde keçirilgen tintüvlerniñ sayısı arttı, adamlar diniy sebeplerden taqip etile, bunı Meclis temsilcileri ve uquq qoruyıcılar bildire.
Ukraina prezidenti Petro Poroşenko İstanbulda iş ziyareti yekünlengen soñ «Normand formatında» telefon lafını keçirdi. O Rusiye tarafından işğal etilgen Qırımda qırımtatarlarnıñ aqları daimiy şekilde bozulmasını mümkün olmağanını qayd etti ve olarnıñ taqip etilmesini toqtatmağa, bundan da ğayrı, siyasiy mabüslerni azat etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
