Link açıqlığı

Avropa Şurasına Qırımda insan aqları saqlanmasını nezaret etüv boyunca tevsiyeler teslim etildi


Vatandaşlar azatlığı merkezi ve EuromaydanSOS Rusiye tarafından işğal etilgen Qırımda insan aqları saqlanması meselelerini nezaret etüv boyunca Avropa Şurasınıñ diqqat ayırması kerek olğan tevsiyeler azırladı. İşbu teklifler, elçi Jerar Ştudmannıñ mahsus missiyasınıñ Qırım yarımadası boyunca esabatına cevap olaraq, Avropa Şurası baş kâtibine açıq mektüpte bildirile.

«Elçi Jerard Ştudman yolbaşçılığındaki mahsus missiyanıñ esabatında bir sıra meseleler açıqlanmayıp qalğanını bildirmek mecburmız, bu meseleler insan aqları boyunca Avropa Konventsiyasınıñ ömürge keçirilmesinde ğayet müimdir. Bundan da ğayrı, «repressiyalar esasen ayırı opponentlerge qarşı yapılğanı aqqında» mahsus missiyanıñ esabatındaki netice halqara ve ukrain uquq qoruyıcılarınıñ neticelerine zıt kele», – dep aytıla mektüpte.

Mektüpniñ tamamlayıcısında 11 saifede deliller ketirile, Qırımda uquq qoruyıcı, mahkeme, penitentsiar saalarındaki konkret bozuvlarnıñ misalleri qayd etile. Er madde boyunca mektüp müellifleri Avropa Şurasınıñ nezaret etmesi vaqtında diqqat etilecek vaziyetler boyunca tevsiyeler bere.

«Qırımda insan aqları saqlanması vaziyeti kerginleşe. Bunıñ içün Avropa Şurasına büyük ümüt beslenile», – dep aytıla açıq mektüpte.

Dört adamdan ibaret olğan Avropa Şurasınıñ eyyeti, isviçreli diplomat, elçi Jerar Ştudmannıñ yolbaşçılığında Qırımda yanvar 25-31 künleri bulundı.

Qırımda Avropa Şurasınıñ temsilcileri rusiyeli yarımada ükümeti, yerli prokuratura temsilcileri, qırımtatar halqı temsilcileri, Rusiye ve Ukraina taraflarını tutqan yarımada faallerinen körüşti.

Elçi Ştudman Rusiye tarafından işğal etilgen Qırımğa Avropa Şurasınıñ ziyareti neticeleri boyunca maruzanı 2016 senesi aprel ayında taqdim etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG