Rusiye Taqiqat komitetiniñ Qırım idaresi mayıs 25-ke keçer gecesi Bağçasarayda ğayıp olğan Ervin İbragimovnıñ qıdırılmasını ilân etti. Bu aqta müessiseniñ matbuat hızmeti bildire.
«Rusiye Taqiqat komitetiniñ Qırım cumhuriyeti boyunca Taqiqat organları tarafından İbragimov Ervin Umeroviçniñ bulunğan yeri belgilene. 2016 senesi mayıs 24-te İbragimov evden çıqtı ve şimdiki vaqıtqa qadar onıñ bulunğan yeri belgilenmegen. Bu vaqia boyunca Rusiye Federatsiyasınıñ Taqiqat komitetiniñ Qırım boyunca Baş taqiqat idaresi tarafından Rusiye Federatsiyasınıñ Cinaiy kodeksiniñ 126 maddesiniñ 2-ci qısmındaki «а,v» maddeleri (insannı hırsızlav) boyunca açılğan cinaiy iş taqiq etile», – dep aytıla beyanatta.
Beyanatta Ervin İbragimovnıñ ayrı belgileri qayd etilgen.
Mayıs 25-te, saba Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov bu gece ğayıp olğanı aqqında bildirile edi. Onıñ maşnası yol ortasında qaldırılğan tapıldı. Mayıs 24-te tahminen saat 23:00-te Ervin babasına telefon etip, ondan maşna vesiqaları aqqında soradı. Bundan soñ Ervinnen bağ bozuldı.
Ğayıp olğan Ervin İbragimov mayıs 25-te Meclis azalarınen Sudaqqa barmağa niyetlene edi, o yerde qırımtatar faalleri mahküm etilecegi planlaştırılğan.
Bundan soñ internette video peyda oldı, videoda Ervin İbragimovnı, tahminlerge köre, Yol patrul hızmetiniñ hadimleri toqtadı, soñra onı mikroavtobusqa oturtmağa tırıştılar, o qaçmağa tırıştı, amma onı tuttılar ve maşnağa oturttılar. Bundan soñ maşna Bağçasaray suv anbarı tarafına, ormandan keçip ketti.
Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
