Qırımtatar Milliy Meclisiniñ reis muavini Ahtem Çiygoz Rusiye tarafından işğal etilgen Qırımdaki apishanelerinden dünya liderlerine muracaat yazdı. Metinni mayıs 26-da Meclis reisi Refat Çubarov Facebook saifesinde paylaştı.
Dünya liderlerine muracaat etip, Ahtem Çiygoz bunı ayttı: «Bu deşetniñ toqtatılması siziñ elleriñizdedir!»
«1944 senesi, SSSR ittifaqdaşlarınıñ köz yummasınen, öz tarihiy territoriyalarından Qavqaz halqları ve qırımtatar halqı sürgün etildi. Bir canavar Gitlerni yeñmek içün diger canavar Stalinge köz yumdılar, ve diger, Sovet ükümeti dep adlandırılğan, faşist nizamınıñ teşkil etilmesine yardım ettiler.
Qadınlar, balalar ve qartlarnıñ millionlarca köz yaşları öz halqlarınıñ abadanlıq ve amanlığı içün qasevetlengen Avropa devletleri ve Amerika liderleriniñ lâqaytlığını aqlamaz. Bu faşist nizamı bozulması içün 50 yıl kerek oldı», – dep aytıla Ahtem Çiygoznıñ muracaatında.
O, «bugün ukrain halqı ve qırımtatarlarnen olğan vaziyet içün dünya liderleri mesüliyetli» olğanını qayd etti.
Onıñ sözlerine köre, «lâqayt olması ya da tek duyğudaşlıq etmesi, öz abadanlığı ve havfsızlığını tüşünmesi menim halqımı horlağanlardan iç farqlanmay».
«Bu deşetniñ toqtatılması siziñ elleriñizdedir! Bizim halqımızğa keçenlerniñ deşetini yañı şekilde kene de başından keçirmege bermeñiz. İnsannıñ ar-namusı ve azatlıq duyğusı bozulsa, bu endi insan sayılmaz», – dep ilân etti Ahtem Çiygoz.
Rusiye tarafından işğal etilgen Qırımda mayıs 27-de mahkemede Meclis reisiniñ muavini Ahtem Çiygoznıñ apiste bulunma müddetiniñ uzattırılmasına qarşı şikâyet arizası baqılacaq.
Ahtem Çiygoz Aqmescit SİZO-sında 2015 senesi yanvar ayından başlap buluna.
Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Qırım Muhtar Cumhuriyeti prokuraturası 2016 senesi mayıs 17-de Qırım parlamentiniñ yanında 2014 senesi fevral 26-da keçirilgen barışıq toplaşuvına mania olması boyunca cinaiy iş açtı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
