Mayıs 26-da saba Qırımda rusiyeli uquq qoruyıcılar tarafından qırımtatarlarnıñ evlerinde yapılğan yañı tintüvler aqqında malümat peyda oldı. Bu aqta adliyeci Emil Kurbedinov ve Qırımtatar Qurultayınıñ Merkeziy saylav komissiyasınıñ reisi Zair Smedlâyev bildireler.
Smedlâyevniñ Qırım.Aqiqatqa bildirgen malümatına binaen, tintüvler qırımtatarlar toplu yaşağan Aqmescit rayonınıñ Boğurça qasabasında keçirile. Kurbedinov Hoş Keldi qasabasında ve Alupkada keçirilgen tintüvler aqqında bildire. Tintüvler sebepleri belli degil.
«Er vaqıt olğanı kibi yasaq olğan edebiyatnı, silânı, narkotiklerni qıdıracaqlar. Yasaq olğan edebiyat olsa, demek, «Hizb ut-Tahrir» boyunca iş olacaq, böyle edebiyat yoq ise, demek, başqa bir sebepten iş açarlar», – dep tahmin etti Smedlâyev.
Emil Kurbedinov Aqmescitte keçirilgen tintüvniñ videosını paylaştı. Videoda maskalı, silâlı uquq qoruyıcılar körüne. Diger tafsilâtlı malümat bildirilmey.
Yañı tintüvler boyunca Qırım uquq qoruyıcılarınıñ resmiy izaatları yoq.
Video youtube: Alim Aydamak
Mayıs 25-te, saba Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov bu gece ğayıp olğanı aqqında bildirile edi. Onıñ maşnası yol ortasında qaldırılğan tapıldı. Mayıs 24-te tahminen saat 23:00-te Ervin babasına telefon etip, ondan maşna vesiqaları aqqında soradı. Bundan soñ Ervinnen bağ bozuldı. Adliyeci Emil Kurbedinovnıñ bildirgenine köre, rusiyeli FSB-niñ Qırım idaresinde Ervin İbragimovnıñ soy-soplarından onıñ ğayıp olması aqqında arizanı ve mütenasip videonı almağa red ettiler.
Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
