Link açıqlığı

Rusiye Federal havfsızlıq hızmeti (FSB) Azatlıq Radiosınıñ mühbiri Mıkola Semenanıñ apayı ve oğullarınıñ birini sorğuğa çeke. Rusiyege boysunğan yarımada ükümeti Mıkola Semenanı separatizmde qabaatladı. Sorğular mayıs 25 ve 26 künleri keçirilecek. Bu aqta Qırım.Aqiqatqa mühbirniñ adliyecisi Emil Kurbedinov bildirdi.

Onıñ qayd etkenine köre, mayıs 24-te, salı künü Mıkola Semenanıñ maqalesi boyunca lingvistik ekspertizanıñ neticeleri peyda oldı. Ekspertiza Qırımda rusiyeli FSB tarafından keçirildi. Taqiqat işleri devamında adliyeci ve mühbir onıñ neticelerinen tanış oldı, amma FSB vesiqa nushasını bermege red etti.

«Ameldeki qanunlarnı bozıp, bizge bu ekspertizanıñ nushasını bermediler. Mıkolağa bu ekspertizadan malümat yazıp almağa da yasaq ettiler, amma onıñ buna aqqı bar. Bunıñ içün şimdi, meselâ, nasıldır qoşma ekspertizanıñ keçirilmesini sımarlamağa ya da nasıldır ekspertnen aqıl tanışmağa imkânımız yoq», – dep qayd etti Kurbedinov.

Bundan evel Mıkola Semena sorğuğa çekilgen soñ qabaatlı statusına keçirilgeni aqqında bildirile edi.

Aprel 19-da, salı künü Rusiyege boysunğan Qırım prokurorı Natalya Poklonskaya Qırım jurnalistine qarşı Rusiye qanunlarınıñ Kütleviy haber vastalarında bastırğan maqaleleri içün «separatizm» aqqında maddesi boyunca cinaiy iş açılğanını bildirdi. O, jurnalistniñ adı ve soyadını aytmadı. Bundan soñ jurnalistnıñ adı Nikolay Semena olğanı belli oldı. Onıñ oğlu Dmitriyniñ bildirgenine köre, uquq qoruyıcılar tintüv keçirgende jurnalistnıñ Radio Svobodanıñ Qırım.Aqiqat leyhası ile alâqalarını qıdırğanlar. Uquq qoruyıcılar eki bilgisayar, malümat taşıyıcılarını alıp, jurnalistni sorğuğa alıp ketkenler.

Mıkola Semena Qırımdan çıqmamaq şartınen azat etildi. O, «Rusiyeniñ topraq bütünligini bozmaq çağıruvı» boyunca qabaatta özüni qabaatlı olğanını red ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG