Rusiyege boysunğan Qırım Yuqarı mahkemesi mayıs 24-te terrorizmde şeklenilgen Qırım musulmanlarınıñ – Enver Mamutov ve Zevri Abseitovnıñ apiste bulunma müddetlerini uzattırmasına qarşı şikâyet arizasını red etti. Bu aqta Qırımda uquq qoruyıcı merkeziniñ idarecisi Aleksandra Krılenkova bildire.
«Enver Mamutovnıñ 7 balası bar, eñ kiçigi 3 aylıq bala, ve bir özü çalışmaq mecbur olğan anası bar. Adliyeci Emil Kurbedinov adamnı aşalamamağa ve mahkeme toplaşuvı devamında onı qafeste tutmamağa çağırdı. Mahkeme bu ricanı red etti. Adliyeciniñ qayd etkenine köre, taqiqat ne Enverniñ qabaatlı olğanını, ne de onıñ taqiqatqa mania olmağa planlaştırğanını ve mania olabilecegini tasdıqlamadı», – dep yazdı Aleksandra Krılenkova Facebook saifesinde.
Uquq qoruyıcınıñ malümatına binaen, Zevri Abseitovnıñ adliyecisi mahkemege müftiden, çalışqan yerinden, qomşulardan ve diger insanlardan hasiyetnameler taqdim etti. Yaqalanğan kişi ise, mahkemege taqiqatqa mania olmağa kerek olmağanını bildirdi, çünki o soñki neticelerden emin.
«Zevriniñ aytqanına köre, iç bir teşkilâtta, bu cümleden onıñ bağlı olğanında qabaatlanğan teşkilâtta iştirak etmey. Ve o ananeviy islâmnı kütkenini, ve bütün edebiyatnı tek camiden alğanını bildirdi», – dep ayttı Krılenkova.
Amma bütün bu delillerge baqmadan, eki Qırım sakini apiste qaldırıldı.
Mayıs 12-de Bağçasarayda rusiyeli uquq qoruyıcılar musulman evlerinde ve yerli qavehanede tintüvler keçirdi. Neticede dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Kelecek kün, mayıs 13-te Rusiyege boysunğan Aqmescitteki Kiyev rayon mahkemesi yaqalanğan kişilerni iyül 11-ge qadar apiste qaldırmağa qarar aldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
