Link açıqlığı

Saatnıñ esas haberi

Qırımda uquq qoruyıcılar İslâmovnen bağlı olğan «SimSitiTrans» şirketine kene keldiler


Qırımda mayıs 20-de Rusiye uquq qoruyıcıları Qırım qamaçavı aktsiyasınıñ lideri Lenur İslâmovnen bağlı olğan Qırımnıñ en büyük müessiselerinden biri «SimSitiTrans» sıñırlı mesüliyetli teşkilâtına keldiler.

Bunı Facebookta «Mahkeme közeticileri Federal hızmetı» yazılğan silâlı insanlarnıñ foto resimleri paylaşıp, Qırım jurnalistı Lilâ Bucurova bildirdi.

Uquq qoruyıcılarnıñ şirketken kelgenini Lenur İslâmov özü Qırım.Aqiqatqa tasdıqladı.

«Bu maña degil, babama ait olğan müessiselerniñ aman-aman otuzıncı tintüvidir. Qorantam, soy-soplarıma bir basqı, anda eskiden ATR telekanalı yerleşken edi. Olar onıñ bir timsali olaraq yoq etmek isteyler. Olar 40 million ruble bergi saydılar, amma Ukrainada bu müessiseler grivna ile çalışqan edi. Olar bütün işlerimni müflis ettireler: bank, müessise, naqliyatımnı tevqif eteler», – dep bildirdi Lenur İslâmov.

Kremlge boysunğan Qırım uquq qoruyıcı hızmetleriniñ resmiy saytlarında «SimSİtiTransta» olğan vaqialar aqqında iç bir malümat yoq. Fevralnıñ başında Kremlge boysunğan Aqmescit akimiyeti «SimSitiTrans» taşıyıcısınen işbirligi toqtatılğanını aydınlatqan edi.

Bundan evel 2016 senesi fevral ayında şirkette tintüv olıp keçti. O vaqıt maska ve cenkâver urbalarda uquq qoruyıcılar naqliye işhanesiniñ işini blok ettiler.

Aqmescit şeeri «SimSitiTrans» naqliât işhanesiniñ işini kimse blok etmedi, fevral 1-de iç bir taqiqat işleri keçirilmedi, dep ayttı Rusiyege boysunğan Qırım prokurorı Natalya Poklonskaya. Onıñ bildirgenine köre, uquq qoruyıcılar daa evel tapılğan bozuvlar aqqında emirni bermek içün keldiler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG