Link açıqlığı

Kyivde qırımtatar halqı sürgünliginiñ qurbanlarını añma kününe bağışlanğan edebiy aqşamğa davet eteler


Ukraina milliy edebiyat müzeyinde mayıs 20-de İslâm medeniy merkeziniñ Bütün Ukraina içtimaiy teşkilatlarınıñ «Alraid» birligi teşebbüsinen qırımtatar halqı sürgünligi qurbanlarına bağışlanğan şiir körüşüvi keçirilecektir.

Tedbir teşkilâtçıları bildireler ki, edebiy aqşamda Ervin Umerov, Ablâziz Veliyev, Eskender Fazıl, Lilâ Bucurova ve başqa yazıcılarnıñ qırımtatarca, rusça ve ukrainsu şiir ve nesir eserleri oqunacaq. Bu mevzuğa bağışlanğan bazı foto ve video malümatlarını kösterecekler.

«Aqibetleri alâ daa is etilgen 1944 senesi mayıs 18 faciası, qırımtatarlarnıñ taqdirlerine büyük tesir ete. Qırımtatar yazıcıları ve şairleri bu faciağa bağışlanğan tesirli eserlerni yazdılar. Olardan bazıları ukrain tiline, bazıları rus tiline tercime etilgen», – qayd eteler teşkilâtçılar.

«Bunıñ içün Milliy edebiyat müzeyinde cemaatnı sürgünlikke bağışlanğan qırımtatar bediiy eserlerinen tanıştırmaq teren manalı ve faydalı bir şeydir», – dep qoşalar olar.

Tedbir çerçivesinde Qırım mevzusına bağışlanğan resim sergisi keçirilecek, qırımtatar ressamları 50 ziyade eserni numayış etecekler.

Tedbir saat 17:00 müzeyde başlanacaq.

18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.

Ukrainada, Qırımda ve bütün dünyada sürgünlik qurbanlarını añma matem tedbirleri keçirildi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâretip, onı «tarihiy adaletniñ tiklenmesi» dep adlay.

XS
SM
MD
LG