Ukrainadaki Amerika Qoşma Ştatları elçihanesi yolbaşçısınıñ muavini George Kent Rusiyeni yarımadada mustaqil kütleviy haber vastalarına yapılğan basqını toqtatmağa çağırdı. O, «Qırım jurnalistlerine qoltutmaq içün» Qırım.Aqiqat muarririyetini ziyaret etip, Rusiye işğal etken yarımadada çalışqan jurnalistlerniñ riskini qayd etti.
«Mence, Qırım.Aqiqat jurnalistleriniñ işi em yarımadada, em de qıtada kütleviy haber vastaları aqlarınıñ qorçalanması içün pek müimdir. Doğrudan-doğru Qırımda adiselerni aydınlatqan jurnalistler qırımlılarğa, ukrainlerge ve bütün dünyağa büyük hızmet eteler. Olar öz işini yapıp, büyük riskke oğratılalar», – dep ayttı o.
George Kent «jurnalist işlerini serbest, basqısız ve yalan qabaatsız alıp barsınlar», dep muracaat etti Rusiye akimietine.
Ukrainadaki Amerika Qoşma Ştatları Elçihanesi yolbaşçısınıñ muavini öz ümüdini bildirdi: Qırımda cinaiy iş açılğan jurnalist Nikolay Semena «ve başqa Rusiye akimiyeti sebebinden zor vaziyette qalğan jurnalistlerge öz işini devam etmege ruhset berirler».
Aprel 19-da Rusiyege boysunğan Qırım prokurorı Natalya Poklonskaya kütleviy haber vastalarında basılğan maqaleler içün Rusiye qanunlarına köre «separatizm» maddesi boyunca Qırım jurnalistine qarşı cinaiy iş açtı. Jurnalistniñ adını va soyadını aytmadı. Soñra Nikolay Semena aqqında söz yürsetilgeni belli oldı. Tintüv vaqtında uquq qoruyıcılar Radio Svobodanıñ Qırım.Aqiqat leyhası ile bağlarnı qıdırdılar. Uquq qoruyıcılar eki bilgisayar, malümat taşıyıcılarını aldılar ve jurnalistni sorğuğa çektiler, dep ayttı oğlu Dmitriy.
Soñra Radio Svoboda ile közetici olaraq çalışqan Nikolay Semena yarımadanı terk etmemek şartı ile azat etildi. O, «Rusiye topraq bütünligini bozması» qabaatlarını red ete.
Adliyecisi Emil Kurbedinov tintüvler keçirilgenini ve daa eki jurnalist yaqalanğanını ayttı.
Qırımnıñ Rusiyege boysunğan prokuraturası saytında daa bir sıra jurnalist boyunca cinaiy işler aqqında malümat peyda oldı. Adları ve soyadlarını aytılmay. Kütleviy haber vastaları malümatına köre Aqmescitte, Yaltada ve Aqyarda 7 evde tintüv keçirildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
