Link açıqlığı

Rusiye kontrol etken Qırım Yuqarı mahkemesinde «fevral 26 işi» iştirakçisi, Qırımtatar Milliy Meclisi reisiniñ muavini Ahtem Çiygoznıñ apis cezasınıñ uzatılması boyunca toplaşuvı başlandı.

Qırımtatar Milliy Qurultayı Merkeziy saylav komissiyasınıñ reisi Zair Smedlâyevniñ bildirgenine köre, mahkeme ögünde turniket, metallodetektor, eki kiriş noqtası qoyuldı.

Ahtem Çiygoznı mahkemege alıp kelgenler. Smedlâyevniñ aytqanına köre, prokuratura apis cezasını daa eki ayğa qadar uzatmağa talap ete. Qabaat bildire ki, «Çiygoz cinayet yapıp, Cemilev ve Çubarovnen (esas Ukrainada bulunğan qırımtatar liderleri – QA) bağ tutmağa devam ete». Prokuratura Çiygoz azatlıqqa çıqsa, «taqiqattan saqlanacaq» ve «şaatlarğa basqı yapacaq», dep qorqa.

Mayıs 18-de Çiygoznı mahkemege ketirmeyip, mahkemeni cuma kününe qaldırdılar.

Rusiyege boysunğan Qırım Yuqarı mahkemesi mayıs 13-te «fevral 26 işi» boyunca qabaatlanğan Ahtem Çiygoz ve Ali Asanovnıñ apiste yatma müddetiniñ uzatılması boyunca imayeniñ şikâyet arizasını red etti.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG