Rusiye Tışqı işler nazirliginiñ resmiy vekili Mariya Zaharova mayıs 19-da olıp keçken brifingde Türkiyeniñ Qırım etrafında «yıqıcı siyaseti» aqqında ayttı. Zaharova Ankaranıñ Qırımdaki adise-vaqialarğa nisbeten baqışları «taraflı» ve «siyasetleştirilgen», dep bildirdi. Onıñ fikirince, Türkiye Qırım meselesini, şu cümleden, 1944 senesi qırımtatar sürgünligini «geopolitik maqsadları» içün qullana.
«Maalesef, Ankara 1944 senesi qırımtatarlarnıñ yarımadadan qanunsız şekilde sürgün etilmesini qullanıp mühtekirlik yapa, bu halq diger halqlarnen beraber o zamannıñ repressiyalarına oğradı. Türkiye prezidenti ve ükümeti em Sovetler Birligi, em de zemaneviy Rusiye qanunsız ve cinaiy tanığan tarihiy facianı qullanıp, teşviqat yapalar», – dedi Zaharova.
O, Türkiye akimiyeti ve diger siyaset adamlarına Qırımğa kelmege teklif etti: «Keliñiz. Amma siz ne içündir kelmeysiñiz. Neden qorqasıñız? Sizni bekleymiz, er şeyni añlatıp kösterirmiz».
Türkiye Zaharovanıñ bu laflarına şimdilik cevap bermedi.
Türkiye Tışqı işler nazirligi qırımtatar halqı sürgünliginiñ 72 yıllığında qoltutuv sözlerini aytıp, Rusiyeniñ Qırım işğalinden soñ qırımtatarlar basqı ve qorquzuvlar altında olğanını qayd etti. Türkiye reberligi Ukraina topraq bütünligine qoltutıp, Rusiyeniñ Qırım işğalini takbih etken edi.
2015 senesi Qırımnı ğayrı resmiy türk eyyeti ziyaret etken edi. Onıñ erkânına alim ve uquq qorçalayıcılar kirdi. Olar yarımadada qırımtatarlarnıñ al-vaziyetini ögrengenler. Eyyet Qırımda ifade serbestligi, tasil, mahkeme işleri, mal-mülk meselelerinde insan aqlarınıñ bozulmasını qayd etti. Türkiye eyyetiniñ Qırımdaki işlerge dair maruzası Rusiye Federatsiyasınıñ prezidenti Vladimir Putinge berildi.
Rusiye ve Türkiye arasındaki munasebetler keçken sene noyabr ayında bozuldı. Türkiye uçağı memleketniñ ava boşluğını bozğan Rusiye Su-24 cenk uçağını urıp tüşürdi. Kreml qabaatını red etip, bir sıra ceza kirsetti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
