Link açıqlığı

Saatnıñ esas haberi

Emine Ceppar: Birleşken Milletler Teşkilâtı forumında qırımtatarlar aqqında malümat Rusiyeni açuvlandırdı


New Yorkta olıp keçken Birleşken Milletler Teşkilâtınıñ tamır halqlar meselelerinden forumında qırımtatarlarnıñ yaşayışı, aq-uquqlarınıñ qorunmasına dair malümat berildi. Ukraina haber siyaseti naziriniñ birinci muavini Emine Ceppar tedbirde iştirak etken ruslarnıñ qozğanını qayd etti.

Onıñ aytqanına köre, tedbirniñ maqsadı halqara toplulıqnıñ qırımtatarlar, olarnıñ medeniyetleri, tarihı ve zemaneviy tarihı aqqında bilgilerni arttırmaqtır.

«Rusiye dünyada seyaat etip, «rus» Qırımında bütün halqlar «amanlıq ve baht» içinde yaşağanını masal añlatqan jurnalist ve diplomatlar, em de «mustaqil ekspertlerni» qullana. Bir qısmı añlata, ekincisi «Qırımbizimni» köstere. Forumdaki vazifemiz – Qırımda olğan kerçeklerni añlatmaq ve farqlı memleketlerden kelgen yüzden ziyade vekillerni qırımtatarlarğa qarşı «yahşı munasebet» olğanına inandırmaq. Elbet de, bizim faalimiz ve bulunğanımız olarnı (ruslarnı) qozdırdı», – dep ayttı Ceppar.

O, tedbir çerçivesinde qırımtatarlar özüni añlatqan «Biz – qırımtatarlarmız» 6 daqqalıq levhasınıñ taqdim etilgenini bildirdi. Rusiye akimiyeti qırımtatarlar ve Ukrainağa qoltutqan insanlarğa daa ziyade basqı yapa.

Daima keçirilgen Birleşken Milletler Teşkilâtınıñ tamır halqlar meseleleri boyunca forumınıñ 15-inci sessiyası mayıs 20-de yekünlenmekte.

Qırım Rusiye tarafından işğal etilgen soñ Ukraina ve halqara uquq qorçalayıcılar, Qırımda insan aqlarına riayet etilmesi vaziyeti fenalaşmağa başlağanı aqqında bir qaç kere bildirdiler. Rusiye akimiyeti tarafından ayrı bir basqı qırımtatarlarğa ve Ukrainağa qoltutqan insanlarğa yapıla.

Rusiyege boysunğan Qırım akimiyetiniñ bildirgenine köre, uquq qorçalayıcılarnıñ insan aqları bozulması aqqında beyanatları ziyade qabartıla.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG