Rostov-na-Donu mahkemesinde olğan toplaşuvda mayıs 18-de, çarşenbe künü, işğal olğan Qırımda apis etilgen «Hizb ut-Tahrir» ile bağ tutqan ve terrorizmde qabaatlanğan 4 musulmannıñ apis cezasını uzattılar. Bu aqqında adliyeci Emil Kurbedinov ve Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev bildireler.
Onıñ malümatına köre, şeklengenlerniñ apis cezaları oktâbr ayına qadar uzatıldı.
«Bugün «Hizb ut-Tahrir işi» adlı iş boyunca keçken sene apiske alınğan Ruslan Zeytullayev, Rustem Vaitov, Primov Nuri ve Sayfullayev Feratnı mahkeme ettiler. Olarğa oktâbr ayına qadar apis cezasını uzattılar ve kelecek mahkeme toplaşuvı Rostov-na-Donu şeerinde iyün 1-de keçirilecegini belgilediler», - dep yazdı Facebookta Smedlayev.
Adliyeci Emil Kürbedinov bildirdi ki, imayeniñ iç bir muracaatını mahkeme qanaatlendirmedi.
«Er şey beklenilgeni kibi oldı. İmayeniñ delillerini körmemezlikke uralar. Mahkemeniñ qararı alınğanda prokuror kelmedi. Demek ki, onıñ içün de er şey ayan oldı. İmayeniñ taqiqatnıñ qanunnı bozıp alğan delillerni lâğu etmek muracaatları red etildi. Mahkemeni Qırımda keçirmek muracaatları da red etildi», – dep yazdı o.
Aqyarda 2015 senesi qışta dört musulman apiske alındı: Ruslan Zeytullayev, Rustem Vaitov, Nuri Primov ve Ferat Sayfullayev. Olarnı Rusiyede «ekstremist» sayılğan «Hizb ut-Tahrir» ile bağlarda qabaatlaylar.
Bundan evel de Qırımda yarımada sakinlerini yaqalağan ediler, Rusiye taqiqatı olarnı «Hizb ut-Tahrir» teşkilâtı ile bağlı olğanlarında qabaatlay.
«Hizb ut-Tahrir» – halqara islam siyasiy fırqasıdır. Onıñ resmiy olaraq deklaratsiya etilgen maqsadı islam devletniñ tesbiti ve musulmanlarnıñ ayat usulını qurmaq. Bu teşkilâtnı resmiy olaraq Rusiyede, Qazahistanda ve Almaniyada yasaqladılar, Ukrainada ve başqa memleketlerni o, faaliyet köstere bile.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
