Qurman rayonınıñ Büyük Onlar qasabasında 1944 senesi maysı 18-de qırımtatar halqı sürgünliginiñ qurbanlarını añmaq içün tahminen biñ kişi keldi, dep bildire Qırım neşiri – Avdet.
«Yerli faaller, ayrıca, Nuridin Seytablaev teşebbüsinen qırımtatar halqı sürgünliginiñ qurbanlarını añmaq içün dua oqudılar. Tedbirge tahminen biñ insan qoşuldı. Qırımtatar halqınıñ meclis kâtibiyet başı Dilaver Akiyevniñ malümatına köre, yasaq olğanı içün tedbirde milliy mektep iştirak etmedi», – dep aytıla haberde.
Tedbirniñ iştirakçileri sükünet daqqasınen qırımtatar halqı sürgünliginiñ qurbanlarını añdılar ve sürgünlik qurbanları abidesine çeçek qoydılar.
18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Ukrainada qırımtatar sürgünligi genotsid olaraq tanıldı. Memlekette bunıñnen bağlı matem tedbirleri keçirilmekte. Sürgünlik qurbanlarını çetelde de añalar.
Er yıl Qırımda sürgünlik kününe bağışlanğan kütleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilmesi yasaq etildi. Qırımtatar Milliy Meclisi bildirdi ki, Qırımdaki regional meclisler Rusiye kontroli altında bulunğan akimiyet mayıs 18 qırımtatar sürgünligi yıllığında matem tedbirleriniñ keçirilmesine izin alamaylar.
Bundan sebep Meclis yarımadadaki semetdeşlerine hatıra yerlerinde sürgünlik qurbanlarını dua ile añmağa tevsiye ete. Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
