Mayıs 18-de, çarşenbe künü, qırımtatar halqı sürgünliginiñ qurbanlarını añma kününde Herson vilâyetiniñ Geniçesk rayonında havfsızlıq tedbirleri alındı.
Bunı Geniçesk rayonı memuriyetiniñ başı Aleksandr Vorobyov Qırım.Aqiqatqa bildirdi.
Onıñ aytqanına köre, cemaatnıñ tertip-nizamını temin etmek içün tahminen 500 uquq qoruyıcısı çalışa, qoşma politsiya küçleri, Ukraina Milliy gvardiyası, «Herson» batayonı, Milliy politsiyanıñ patrul-noqta hızmeti, ekim brigadası ve qurtarıcılar celp etildi.
Mayıs 18-de saat 13-ten 18-ge qadar «Çonğar» kiriş-çıqış kontrol noqtası vatandaşlarnı ve naqliyatnı keçirmeycek, dep bildirdi Aleksandr Vorobyov. Ukraina sıñırcıları bu malümatnı alâ daa tasdıqlamadı. Qırım.Aqiqat Ukraina Devlet sıñır hızmetinden tefsir almağa tırışa.
Herson vilâyetiniñ Geniçesk rayonında sürgün qurbanlarınıñ añma künyüne bağışlanğan bir sıra tedbir keçirilecek. Böylece, saat 11:30 qırımtatarlar toplu yaşağan yerlerde (Novoalekseyevka, Partizanlar, Sçactlivtsevo, Strelkovoda) vatandaşlarnıñ toplaşuvı keçirilecek, saat 12:00 bütün Ukraina «ses ber» aktsiyasına qoşulacaqlar, saat 13:00 Geniçesk rayonı memuriyetınıñ yanında hatıra mitingi keçecektir.
Tedbirlerniñ iştirakçileri saat 14:00 avto yürüşnen işğal etilgen Qırım memuriy sıñırğa ketecekler, anda ise saat 16:00 «Çonğar» kontrol noqtası yanında miting olacaq.
18 mayıs – qırımtatar halqınıñ sürgünlik qurbanlarını añma künüdir. Bu künde er yıl 1944 senede olğan facialı künlerni hatırlaylar, yarımadadan tamır halqını Orta Asiyağa yolladılar. Cemi olaraq tahminen 190 biñ insan sürgün etildi.
Ukrainada qırımtatar halqnıñ sürgünini genotsid olaraq qabul ettiler. Bütün ülkede bir sıra tedbirler planlaştırdılar.
Er yıl Qırımda sürgün kününe bağışlanğan kutleviy tedbirler keçirile edi, şu cümleden Aqmescitniñ merkezinde matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilüvi yasaq etildi. Bu yıl da istisna olmadı. Qırımtatar halqınıñ Meclisinde aytqanlarına köre, maaaliy akimiyetler regional meclislerge ayrı tedbirlerni keçirmege ruhset bermediler ve boysunğan akimiyetniñ tedbirlerge qoşulmağa tevsiye ettiler.
Bunıñ içün Meclis yarımadada olğan vatandaşlarğa abideviy yerlerde sürgün olğanlar içün dua etmege tevsiye ete.
