Ottawada Canada parlamentinde qırımtatar sürgünligi qurbanları añıldı. Canadada Ukraina elçisi Andrey Şevçenko bildire ki, parlament yanında qırımtatarlarnıñ lideri Mustafa Cemilev ve Canada parlamentiniñ deputatları iştiraki ile miting olıp keçti.
Miting soñunda deputat, faal, uquq qorçalayıcılar ve ukrain cemiyetiniñ vekilleri flashmob keçirip, qırımtatar tamğasını yapqanlar.
«Halqımıznı zafer künü degil, sürgünlikniñ facialı künü birleştirdi, – dep ayttı Mustafa Cemilev. – Amma eminim, tezden büyük künümiz olacaq – Qırımnıñ işğalden azat etilmesi ve Ukraina topraq bütünliginiñ ğayrıdan tiklenmesi künü».
Ottawada Cemilev Canada memurları ve deputatlarınen körüşip, Canadanıñ Qırım meselesinde daa sert yanaşmasını muzakere ete. O, Qırımda repressiyalarğa oğratılğan qırımtatarlarğa qoltutmağa çağıra – Qırımnı terk etmege mecbur olğanlarğa yardım etmek, yarımadada kerçek malümatnıñ tarqatılmasına imkân bermek, em de Qırımnıñ işğalden qurtarma yollarınıñ muzakere etilmesi içün halqara platformanı qurmaq.
«Qırımtatarlar ve Ukrainağa birdemlik köstermek içün mındamız. Canada gumanitar yardımını arttırmalı, işğalcilerge qarşı ceza yolları bar. Çette qalamaymız», – dep qayd etti Canada parlamentinde Ukraina ile dostluq gruppasınıñ reisi Boris Vjesnevskiy.
Mustafa Cemilevniñ Canada ziyareti ve qırımtatar flashmobı Ukraina elçihanesiniñ ve ukrain cemiyetiniñ yardımınen teşkil etildiyu
Canada Qırım işğalini ve Rusiyeniñ Ukraina istilâsını sert bir şekilde takbih ete, Ukrainağa eñ çoq yardım etken dünya liderlerinden biri ola.
18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Ukrainada qırımtatar sürgünligi genotsid olaraq tanıldı. Memlekette bunıñnen bağlı matem tedbirleri keçirilmekte. Sürgünlik qurbanlarını çetelde de añalar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
