Link açıqlığı

Cemilev mayıs 18 arfesinde qırımtatarlarğa muracaat etti


Qırımtatarlarnıñ milliy lideri Mustafa Cemilev vatandaşlarını öz aq-uquqlarını daa faal sürette qorçalamağa çağıra. Bunı qırımtatar sürgünliginiñ yıllığı arfesinde Mustafa Cemilev Qırım.Aqiqatqa bildirdi.

«Öz aqlarnı qorçalamaq içün çoq – zorbalıqsız, demokratik usullar bar. Bu taraftan vatandaşlarımnı daa faal olmağa çağıram», – dep qayd etti siyasetçi.

Onıñ aytqanına köre, sürgünlik yıllığı qırımtatarlar içün tek qabaatsız öldürilgen, elâk ölgenler añılğan künü degil, halq birligini köstergen bir kündir.

«Aynı zamanda da biz bar olğanımıznı kösteremiz. Qırım – bizim Vatanımız ve er vaqıt Vatanımız qalacaq. Halqımıznıñ birligi, qanuniy aqlarımıznı qorçalavda cüratlığımıznıñ kösterilmesi de», – dep qayd etti qırımtatar halqnıñ milliy lideri.

Öz aq-uquqlarını qorçalağanda qırımtatarlar er daim zorbalıqsız usullarnı qullanğanlar, dep hatırlattı o.

18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.

Er yıl Qırımda sürgün kününe bağışlanğan kutleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilüvi yasaq etildi.

Kyiv ve bütün Ukrainada bir sıra tedbirler keçirilecek: kütleviy mingler, mekteplerde qırımtatar halqınıñ sürgünligine bağışlanğan dersler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG