Mayıs 17-den 18-ne keçer gecesi Aqmesjitte belgisiz şahıslar Dolgorukovskaya soqağında Rusiye Federatsiyasınıñ kommunistler firqası Qırım bölüginiñ ofisi yerleşken binadaki İosif Stalinniñ hatıra tahtasına mavı boya tökkenler.
Bunı Aqmescit deputatı, Qırım RFQF cumhuriyet komitetiniñ azası Stepan Kiskinniñ mabuat hızmeti bildire.
«Qırımdan sürgünlik qurbanlarını añma kününe bağışlanğan planlaştırılğan bir provokatsiya olğanını tüşünem. Bizni, qırımlılarnı, birisi qavğa ettirecek ola, amma bu vandal ekstremistler maqsadına yetmeycek!», – dep ayttı Kiskin.
Siyasetçi hatırlattı ki, RFKF Qırım bölügi ofisiniñ binasında asılğan Stalin tahtasını 2016 senesi mart ayında da aramlağan ediler.
«O vaqıt Qırım prokuraturası ve Federal havfsızlıq hızmetiniñ Qırım idaresine muracaat etken edim, amma bugünge qadar aramlarğanlarnıñ yaqalanğanını ve ceza berilgenini haber etmediler! Qırım kommunistleri bugünki vandallıq areketini öyle qaldırmazlar. Qırım prokuraturası ve FSB idaresine tekrar muracaat etecem. Ümüt etem ki, bu sefer kerek olğanı kibi cevap berirler», – dedi deputat.
Onıñ aytqanına köre, Qırımdaki uquq qoruyıcılar kene bir kimseni tapmasalar, o, «yuqarı nezaret hızmetlerine» muracaat etecek.
Uquq qoruyıcılarnıñ izaatları şimdilik yoq.
Hatıra tahtası sovet diktatorı İosif Stalinniñ Qırımda 1945 senesi Gitlerge qarşı koalitsiya devletleriniñ yolbaşçıları toplaşqan Qırım (Yalta) konferentsiyasını ziyaretine bağışlana.
Kyivniñ apellâtsion mahkemesi 2010 senesi bolşevik totalitar rejimi, şu cümleden İosif Stalinniñ, Ukrainadaki 1932-33 seneleri genotsidinde qabaatlı olğanını tanıdı. Mahkeme qararınen Ukraina havfsızlıq hızmeti taqiqatçılarınıñ 1932-1933 seneleri USSC topraqlarında ukrain milletini yoq etmek içün yaratılğan yaşayış şaraitlerine bolşevik totalitar rejimi alâqalı olğanına dair delillerni tasdıqladı.
Mahkeme, ilmiy-demografik ekspertiza neticesinde alğan malümatlarğa köre, açlıqtan 3 million 941 000 insan elâk olğanını bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
