Çarşenbe künü, mayıs 18 – qırımtatar halqı sürgünliginiñ qurbanlarını añma künüdir. Er yıl bu künde 1944 senesiniñ facialı adiseleri añıla, tamır halq yarımadadan Ural ve Orta Asiyağa sürgün etilgen edi.
Ukrainada qırımtatar sürgünligi genotsid olaraq tanıldı. Çarşenbe künü bir sıra tedbir keçirilmesi planlaştırıla.
Saba T.G.Şevçenko Kyiv milliy universitetiniñ binası yanında aktsiya keçirilecek – gençler canlı qırımtatar bayrağını yapacaqlar.
Taras Şevçenko Ukraina Milliy operasında memleketniñ birinci şahısları ve qırımtatar halqınıñ liderleri iştiraki ile hatıra aqşamı keçirilecektir. Tedbirde cemaat ve siyaset erbapları, Ukrainada çetel diplomatik missiyalarınıñ yolbaşçıları, halqara teşkilâtlarnıñ vekilleri, medeniyet ve ilim adamları, din teşkilâtlarınıñ reberleri iştirak etecektir.
Ukraina Medeniyet nazirliginiñ malümatına köre, hatıra aqşamında Ukrainskoye radio nam qazanğan akademik simfonik orkestri ve Milliy nam qazanğan «Dumka» akademik kapellasınıñ icrasında eserler olacaq, qırımtatarca ve ukraince şiirler oqulacaq.
Aqşam Mustaqillik Meydanında qırımtatar halqı genotsidiniñ qurbanları hatırasına miting keçirilecektir.
Ukraina devlet kütleviy haber vastaları çarşenbe künü yayınlarnıñ bir qısmını sürgünlik ve qırımtatar genotsidi mevzusına bağışlaycaqlar. Üyle vaqtında milliy telekanallarğa sürgünlik qurbanlarını sukünet daqqası ile añmağa, yayın programmasında eglence yayın ve filmlerni alıp taşlamağa tevsiye etildi.
Añma tedbirleri Herson vilâyeti, Lviv ve Ukrainanıñ diger şeerlerinde de keçirilecek.
Qırımtatar Milliy Meclisi bildirdi ki, Qırımdaki regional meclisler Rusiye kontroli altında bulunğan akimiyet mayıs 18 qırımtatar sürgünligi yıllığında matem tedbirleriniñ keçirilmesine izin alamaylar
Qırımda bu künde Rusiye kontrol etken akimiyet hatıra yerlerinde çeçek qoyulğanını bildire, Aqmescit merkezinde ise «Yüreginde ateş yaq» aktsiyası keçirilecek.
Er yıl Qırımda sürgünlik kününe bağışlanğan kütleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilmesi yasaq etildi. Qırımtatar Milliy Meclisi bildirdi ki, Qırımdaki regional meclisler Rusiye kontroli altında bulunğan akimiyet mayıs 18 qırımtatar sürgünligi yıllığında matem tedbirleriniñ keçirilmesine izin alamaylar.
Bundan sebep Meclis yarımadadaki semetdeşlerine hatıra yerlerinde sürgünlik qurbanlarını dua ile añmağa tevsiye ete.
1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
