Qırımtatar Milliy Meclisiniñ reisi Refat Çubarov işğal etilgen Qırımda yaşağan semetdeşlerine mayıs 18-de hatıra yerlerine kelip, sürgünlik qurbanlarını dua ile añmağa tevsiye ete.
Onıñ fikirince, yarımadada facialı yıllıq munasebetinen kütleviy tedbirlerniñ keçirilmesi yasaq etilgeninden sebep qırımtatarlar bunı yapa bileler.
«Qırımda qırımtatarlarnı işğalciler ve hızmetçiler teşkil etken tedbirlerde iştirak etmege mecbur etmege tırışalar», – dep yazdı Meclis reisi Facebookta.
O, çarşenbe künü saat 11:45 Qırımdaki hatıra taşları ve 1944 senesi mayıs 18 künü faciasınen bağlı yerlerde toplaşıp, sürgünlik ve ğurbette elâk olğanlarnı dua ile añmağa çağırdı.
Çubarov Ukrainada keçirilecek sukünet daqqasına qoşulmağa rica ete. Sukünet daqqasından soñ maşinalarnıñ ses berecek, dep bildirdi o.
18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Er yıl Qırımda sürgün kününe bağışlanğan kutleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilüvi yasaq etildi.
Kyiv ve bütün Ukrainada bir sıra tedbirler keçirilecek: kütleviy mingler, mekteplerde qırımtatar halqınıñ sürgünligine bağışlanğan dersler.
Qırımtatar Milliy Meclisi reisiniñ muavini Nariman Celâl Qırım.Aqiqatqa bildirdi ki, Qırımdaki regional meclisler Rusiye kontroli altında bulunğan akimiyet mayıs 18 qırımtatar sürgünligi yıllığında matem tedbirleriniñ keçirilmesine izin alamaylar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
