Mayıs 18-de Lvov şeerinde qırımtatar sürgünliginiñ 72 yıllığına bağışlanğan bir sıra merasimler, bu cümleden mitingler, fotoresim sergileri ve diger aktsiyalar teşkil etilecek.
Matem kününe bağışlanğan Lvov merasimleri Qırımtatar Milliy Meclisi, «Krım SOS» cemaat teşkilâtı ve «Lvovda Qırım evi» qırımtatar medeniyet evi tarafından teşkil etile.
Çarşenbe künü Krakovskaya ve Armânskaya soqaqlarınıñ çatışmasında açıq avada qırımtatar fotografınıñ «Men de sağınam. Seniñ Qırımıñ» adlı fotoresim sergisi, Lesâ Ukrainka teatrınıñ yanında «Halqnen vatanğa qaytacağımızda» adlı graffiti taqdim etilecek. Svoboda caddesinde ve T.G. Şevçenko abidesi yanındaki meydanda aqşam matem mitingi, bundan soñ «Yüregiñde çıraq yaq» aktsiyası keçirilecek.
Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.
Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.
Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
