Link açıqlığı

Celâl: sürgünlik qurbanlarınıñ hatırasına bağışlanğan Çatırdağ seferi siyasetçiler içün yapılmay


Ukraina, Qırım, Sürgünlik qurbanlarına bağışlanğan Çatırdağ seferi, 2015

Qırımtatar Milliy Meclisi reisiniñ birinci muavini Nariman Celâl 1944 senesi sürgünlik qurbanlarınıñ hatırasına bağışlanğan Çatırdağ seferine barmamağa çağırmaq mantıqsız dep saya.

Siyasetçi Facebook saifesinde öz fikrini, bu merasim etrafındaki provokatsiyalar sefer iştirakçileriniñ kerçek niyetlerine tesir etip olamaz dep, añlattı.

«Yaşlarnıñ bir gruppası qırımtatar halqı sürgünligi qurbanlarınıñ hatırasına bağışlanğan Çatırdağ seferini teşkil etmege qarar aldı. Ve başlandı... «Olardan faydalanalar! Olar tek RashaTV içün resim yaparlar!» Büyük ihtimalde, böyle de olacaq. Amma, birinciden, rusiyeli televizionnıñ ne qadar utanmazca ve yalancı olğanı er keske belli. Olarnıñ resmi nasıl olacağından o qadar qasevetlenmek kerekmi, eken? Bu sebepten bölünmek kerekmi, eken? Jamalanıñ yırı, rusiyeli mühbirleri tarafından yapılğan «izaatından» soñ güzelligini coydımı, yoqsa?», – dep yazdı Celâl.

Onıñ sözlerine köre, musulman dinine binaen, bütün yapqan işleriñniñ esası niyettir. «Bellesem, yani ümüt etem ki, bu gençlerniñ niyetleri doğrudır. Olarğa öz birligini ve ükümet qorquzmalarına olğan immunitetini taqdim etmege istek areket etmege yardım ete», – dep qayd etti Meclis reisiniñ birinci muavini.

Qırımtatar sürgünligi künü arfesinde Qırım Müftiyatı «Çatırdağ seferi» ananeviy aktsiyasınıñ keçirilmesi aqqında ilân etti. Buña cevap olaraq, Meclis reberleri vatandaşlarnı bu merasimni boykot etmege, ve böyleliknen Rusiyeniñ yarımadada areketlerine sessiz narazılıq bildirmege çağırdı.

Qırımtatarlar Çatırdağ seferini mayıs 18 arfesinde 2010 senesinden başlap teşkil ete. Bu dağ töpesi yarımadada eñ ükseklerden biri sayıla – 1527 metr. Bu yerge barıp çıqmaq içün küç kerek, ve bu merasimde esasen gençler iştirak ete edi. Başından bu aktsiyanı keçirmek teşebbüsini qırımtatar gençler teşkilâtları bildirdi, yıllar keçken soñ oña Meclis de qol tuttı.

Adet üzre, iştirakçiler dağ töpesine çıqıp, o yerde 1944 senesi sürgünlik qurbanlarını dua ile añğan edi, qırımtatar milliy gimnini icra etken edi. Çoqusı qırımtatar bayraqlarınen kele edi.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG