Link açıqlığı

Saatnıñ esas haberi

Ankarada qırımtatar sürgünligi qurbanlarınıñ hatırasına bağışlanğan miting keçirildi – kütleviy haber vastaları


Mayıs 14-te, cumaertesi künü Ankaranıñ merkeziy Anadolu meydanında 1944 senesi qırımtatar sürgünligi qurbanlarınıñ hatırasına bağışlanğan miting keçirildi, dep bildire QHA agentligi.

Agentlikniñ malümatına binaen, Türkiyeniñ çeşit köşelerinden paytahtqa öz noqta-i nazarını bildirmege ve qırımtatar halqı qurban olğan qanunsızlıqqa qarşı çıqmağa istegen qırımtatarlar keldi.

Bu sene merasim derneklerniñ eñ büyük birleşmesi olğan Qırımtatar cemaat teşkilâtlarınıñ Platforması tarafından teşkil etildi. Platformanıñ İcra şurasınıñ azası Namık Kemal Bayarnıñ bildirgenine köre, matem mitinginde tahminen beş biñ insan iştirak ete.

Bildirilgen malümatqa köre, miting iştirakçileri işğal şaraitte bulunğan qırımtatar halqınıñ vaziyetine kene de diqqat celp etmege isteyler, dünya toplulığını Rusiyeniñ zorbalıq siyasetini takbih etmege ve Qırımtatar Milliy Meclisiniñ yasaq olunmasına qarşı çıqmağa çağıra.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG