Link açıqlığı

Rusiye tarafından işğal etilgen Qırımda «fevral 26 işi» boyunca mahküm etilgen Qırımtatar Milliy Meclisiniñ reis muavini Ahtem Çiygoz kene de mahkeme işi sımarlanğan olğanını qayd etti.

Mayıs 13-te keçirilgen mahkeme toplaşuvında Çiygoznıñ aytqan sözlerini Meclis reisiniñ birinci muavini Nariman Celâl Facebook saifesinde paylaştı.

«Bütün bu areketlerge bir emir bar, siyasetçilerniñ emri, ükümet adamlarınıñ emri bar. İç bir öz başına çalışqan mustaqil mahkeme sisteması, ükümet Rusiyede yoq. Çünki Rusiye terrorizm yolunı aldı», – dedi Ahtem Çiygoz.

Onıñ sözlerine binaen, rusiyeli ükümet qırımtatarlarnı, tek sovet vaqtında degil, diger vaqıtlarda da «siyasetçiler işlep çıqarğan şekil boyunca» mahküm eteler, yaqalaylar.

Ahtem Çiygoz Aqmescitteki apiste 2015 senesi yanvar 29-dan başlap buluna. Aprel 29-da onıñ apiste bulunması müddetini mayıs 22-ge qadar uzattırdılar.

Rusiyege boysunğan Qırım Yuqarı mahkemesi mayıs 13-te «fevral 26 işi» boyunca qabaatlanğan Ahtem Çiygoz ve Ali Asanovnıñ apiste bulunma müddetiniñ uzattırılması boyunca imayeniñ şikâyet arizasını red etti.

Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG