Rusiyede ve işğal etilgen Qırımda internet-qullanıcıları içün Azatlıq Radiosınıñ Qırım.Aqiqat leyhasınıñ saytı kene de açıq. Bu aqta em sayt oquyıcıları, em de Rusiye nezaret komitetinde bildireler. Rusiye nezaret komiteti saytnı bir künge blok etti.
Hususan, müessiseniñ matbuat kâtibi Vadim Ampelonskiy rusiyeli haber agentliklerine bildirgen malümatqa binaen, Qırım.Aqiqat muarririyeti bir malümatnı yoq etmek şartını ömürge keçirdi, bunıñ içün saytqa kiriş kene de açıldı.
Aynı vaqıtta Rusiyege boysunğan işğal etilgen Qırım prokurorı Natalya Poklonskaya Rusiye ve Qırım territoriyasında internet-qullanıcılarınıñ Qırım.Aqiqatqa kirişi qapalı olmasına israr ete.
Mayıs 11-de aqşam Rusiyedeki ve Qırımdaki qullanıcılar Qırım.Aqiqat saytına kiriş blok etilgeni aqqında bildirdi. Kelecek kün rusiyeli prokuror Natalya Poklonskaya saytqa kiriş Rusiye nezaret komiteti tarafından blok etilgeni aqqında malümatnı tasdıqladı. Bundan evel Poklonskaya Azatlıq Radiosınıñ Qırım.Aqiqat leyhasını tolusınen blok etmek içün vesiqalarnı toplağanını ilân etti.
Ukraina Mustaqil media-zenaat birliginde Qırım.Aqiqat etrafında olğan vaziyet sebebinden OSCE Kütleviy haber vastalarınıñ serbestiligi boyunca vekâletli temsilcisiniñ ofisine muracaat etmege niyetlengenlerini bildirdiler.
Ukraina Haber siyaseti nazirliginde «Sıñırsız mühbirler» halqara devletke baqmağan teşkilâtqa Rusiyede ve işğal etilgen Qırımda Azatlıq Radiosınıñ Qırım.Aqiqat leyhasınıñ saytına kiriş blok etilgenine uquqıy taraftan izaat ve neticelerni bildirmege muracaat azırlağanlarını ilân ettiler.
Ukraina Baş prokuraturasınıñ yanındaki Qırım Muhtar Cumhuriyeti prokuraturası Rusiyede ve işğal etilgen Qırımda Qırım.Aqiqat saytına kiriş blok etilgeni sebebinden cinaiy iş açtı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
