Link açıqlığı

Saatnıñ esas haberi

Qırım.Aqiqat saytına kiriş blok etilgeni sebebinden QMC prokuraturası cinaiy iş açtı


Ukraina Baş prokuraturasınıñ yanındaki Qırım Muhtar Cumhuriyeti prokuraturası Rusiyede ve işğal etilgen Qırımda Qırım.Aqiqat saytına kiriş blok etilgeni sebebinden cinaiy iş açtı.

Bu aqta QMC prokuraturasınıñ matbuat hızmeti bildire.

Müessiseniñ bildirgen malümatına binaen, cinaiy iş Ukraina Cinaiy Kodeksiniñ 171 maddesiniñ 1-ci qısmında belgilengen cinayet – mühbirlerniñ zenaat boyunca qanuniy faaliyetine aselet mania olması – alâmetleri boyunca açıldı.

«Qanunsız şekilde vaqtınca işğal etilgen Qırım territosiyasında teşkil etilgen organlar kene de, Ukraina Ana yasası ve halqara uquq qaideleri tarafında kefil olunğan söz serbestligini sıñırlap, mühbirlerniñ zenaat boyunca qanuniy faaliyetine aselet mania olalar», – dep ilân ettiler prokuraturada.

İşbu cinaiy işniñ malümatı Ukraina Baş prokuraturasına teslim etilgeni aqqında bildirile.

Bu afta Rusiyedeki ve Qırımdaki qullanıcılar Qırım.Aqiqat saytına kiriş blok etilgeni aqqında bildirdi. Bundan soñ rusiyeli prokuror Natalya Poklonskaya saytqa kiriş blok etilgeni aqqında malümatnı tasdıqladı.

Bundan evel Poklonskaya Azatlıq Radiosınıñ Qırım.Aqiqat leyhasını tolusınen blok etmek içün vesiqalarnı toplağanını ilân etti.

Ukraina Mustaqil media-zenaat birliginde Qırım.Aqiqat etrafında olğan vaziyet sebebinden OSCE Kütleviy haber vastalarınıñ serbestiligi boyunca vekâletli temsilcisiniñ ofisine muracaat etmege niyetlengenlerini bildirdiler.

Ukraina Haber siyaseti nazirliginde «Sıñırsız mühbirler» halqara devletke baqmağan teşkilâtqa Rusiyede ve işğal etilgen Qırımda Azatlıq Radiosınıñ Qırım.Aqiqat leyhasınıñ saytına kiriş blok etilgenine uquqıy taraftan izaat ve neticelerni bildirmege muracaat azırlağanlarını ilân ettiler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG