Mayıs 13-te, cuma künü Stokgolm şeerinde qırımtatar milliy lideri, Ukraina halq deputatı, qırımtatar halqınıñ meseleleri boyunca Ukraina prezidentiniñ vekâletlisi Mustafa Cemilev işğal etilgen Qırım meselelerine bağışlanğan seminarda iştirak ete.
Bu aqta vekaletliniñ matbuat hızmeti bildire.
Bildirilgen malümatqa binaen, seminar İsveçiya halqara meseleler institutında (UI, Utrikespolitiska institutet) keçirile.
Mayıs 12-de rusiyeli uquq qoruyıcılar Rusiye tarafından işğal etilgen Qırımda musulmanlarda ve yerli qavehanede nevbetteki tintüvlerni keçirdi. Bir qaç insan yaqalandı.
Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.
Meclis reisi Refat Çubarov mayıs 12-de yüz bergen vaqialarnı qırımtatarlarğa ücüm dep, adlandırdı.
Bu kün Avropa Parlamentinde Rusiye tarafından işğal etilgen Qırımda qırımtatarlarnıñ aq-uquqları bozulması meselesi muzakere etildi. Neticede Avropa Parlamenti yarımadada Qırımtatar Milliy Meclisiniñ faaliyetini yasaq etkenlerge qarşı sanktsiyalarnı daa qattı yapmağa ve yarımadada rusiyeli ükümet tarafından yapılğan insan aqları bozulması boyunca halqara taqiqat alıp barmağa çağırdı.
Ukrain ve halqara uquq qoruyıcı teşkilâtları Qırım Rusiye tarafından işğal etilgen soñ yarımadada insan aqları bozulğanı aqqında ilân ete edi. Rusiye ükümeti tarafından eñ büyük basqın qırımtatarlar ve yarımadada yaşağan ukrain tarafını tutqanlarğa qarşı yapıla.
Rusiyege boysunğan Qırım ükümeti uquq qoruyıcılarnıñ yarımadada insan aqları bozulması aqqında malümat qabartılğan, dep ayta.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
