Qırımtatar Milliy Meclisiniñ reis muavini Nariman Celâl Rusiyege boysunğan Qırım Yuqarı mahkemesi mayıs 13-te «fevral 26 işi» boyunca qabaatlanğan Ahtem Çiygoz ve Ali Asanovnıñ apiste bulunma müddetiniñ uzattırılması boyunca imayeniñ şikâyet arizasını red etkenini bildirdi.
Onıñ malümatına köre, dava boyunca qabaatlanğan üçünci kişi – Mustafa Degermenciniñ bu kibi şikayet arizasınıñ baqılması diger künge keçirildi.
«Mahkemeci Pribılova Asanov ve Çiygoznıñ adliyecisi bergen şikâyet arizasını red etti. Degermenciniñ şikâyet arizasınıñ baqılmasını, adliyeci yoq olğanı sebebinden, mayıs 16-ğa saat 9:30-ğa keçirdiler», – dep yazdı Celâl Facebook saifesinde.
Rusiyege boysunğan Aqmescitteki Kiyev rayon mahkemesi bundan evel dava boyunca qabaatlanğan kişilerniñ apiste bulunma müddetlerini uzattırdı, imayeciler bunı qanunsız dep saya.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
2016 senesi fevral ayında rusiyeli Qırım Yuqarı mahkemesiniñ toplaşuvında bu işni tekrar taqiq etilmesine yollamağa qarar alındı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
