Link açıqlığı

Qırımtatar Qurlutayınıñ Merkeziy saylav komissiyasınıñ reisi Zair Smedlâyev mayıs 12-de Bağçasaraydaki qırımtatarlarnıñ yaqalanuvını qırımtatar halqınıñ temsilcilerini aq-uquqlarını qorçalamaq içün daa radikal usullarnı qullanmağa celp etmek ıntıluvı olğanını saya. Bu aqta o Facebook saifesinde yazdı.

Smedlâyev tintüv ve yaqalavlar Meclis temsilcileriniñ rusiyeli ombudsmen Tatyana Moskalkova ile körüşkeninden soñ kelecek kün yüz bergenini bildirdi.

«Bu kibi provokatsiyalar vastasınen qırımtatarlarnı öz küreşini zorbalıqsız usuldan daa radikal usulğa keçmege mecbur etmege isteyler. Bu yerde terrorizm ve ekstremizge qarşı küreş alıp barğan bölükler olsa, demek, terrorist ve ekstremistler olması da kerek, olarnı teşkil etmek içün ise tek vaqıt kerek, tecribe ise birevlerde bardır», – dep yazdı Smedlâyev.

O, basqınğa baqmadan, vatandaşlarnıñ aq-uquqlarını qorçalamağa devam etmege niyetlengenini qayd etti.

Mayıs 12-de rusiyeli uquq qoruyıcılar Rusiye tarafından işğal etilgen Qırımda musulmanlarda ve yerli qavehanede nevbetteki tintüvlerni keçirdi. Bir qaç insan yaqalandı.

Rusiyege boysunğan işğal etilgen Qırım prokurorı Natalya Poklonskaya mayıs 12-de operativ-taqiqat işleri alıp barılğanı, ve neticede «Hizb ut-Tahrir» tarafdarları yaqalanğanı aqqında bildire. Onıñ malümatına köre, 4 insan yaqalandı, 3 Bağçasaray sakinine qarşı cinaiy iş açıldı.

Söz Zevri Abseitov, Remzi Memetov, Rustem Abeltarov ve Enver Mamutov aqqında yürsetile.

Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.

Aynı bu kün Qırımtatar Milliy Meclisiniñ reis muavini İlmi Umerovnıñ evinde tintüv keçirildi. Onı Rusiye Federal havfsızlığı hızmetinde sorğuğa çektiler, bundan soñ oña Qırımdan çıqışnı yasaq etken vesiqanı berdiler.

Meclis reisi Refat Çubarov mayıs 12-de yüz bergen vaqialarnı qırımtatarlarğa ücüm dep, adlandırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG