Link açıqlığı

Jamala Qırımda tintüv ve yaqalavlar aqqında: «Eurovision» yarışında yırım daa aktual oldı


«Eurovision» yarışında Ukrainanı temsil etken qırımtatar yırcısı Jamala konkursta icra etken öz yırını mayıs 12-de Qırımda keçirilgen tintüv ve yaqalavlardan soñ daa aktual olğanını saya.

Bu aqta o Stokgolm şeerinde cumaaqşamı künü, öz çıqışından soñ ayttı, dep bildire Qırım.Aqiqat.

«Yazıq ki, böyle vaqialar aqqında eşitkende, menim yırım daa aktual olğanını duyam», – dedi Jamala.

«Şimdiki vaqıtta Qırımda yüz bergen vaqialar pek kederlete. Ümüt etem ki, er şey yahşı olacaq. Men bütün Ukrainağa yırlayım, Qırım içün yırlayım, ve kerçekten de, menim yırım deñizdeki tamçı olıp, ihtimal, Ukrainadaki ve qırımtatarlarnıñ vaziyetini añlatmağa yardım etecegini isteyim», – dedi Jamala.

«Eurovision-2016» yarışında Ukrainanı temsil etken qırımtatar yırcısı Jamala (Susana Camaladinova) mayıs 12-de halqara yır konkursınıñ finalına keçti, final mayıs 14-te Stokgolm şeerinde keçirilecek.

Jamala yarışta Qırımdan qırımtatarlarnıñ sürgünligine bağışlanğan «1944» yırını icra ete.

Mayıs 12-de rusiyeli uquq qoruyıcılar Rusiye tarafından işğal etilgen Qırımda musulmanlarda ve yerli qavehanede nevbetteki tintüvlerni keçirdi. Bir qaç insan yaqalandı.

Rusiyege boysunğan işğal etilgen Qırım prokurorı Natalya Poklonskaya mayıs 12-de operativ-taqiqat işleri alıp barılğanı, ve neticede «Hizb ut-Tahrir» tarafdarları yaqalanğanı aqqında bildire. Onıñ malümatına köre, 4 insan yaqalandı, 3 Bağçasaray sakinine qarşı cinaiy iş açıldı.

Söz Zevri Abseitov, Remzi Memetov, Rustem Abeltarov ve Enver Mamutov aqqında yürsetile.

Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.

Aynı bu kün Qırımtatar Milliy Meclisiniñ reis muavini İlmi Umerovnıñ evinde tintüv keçirildi. Onı Rusiye Federal havfsızlığı hızmetinde sorğuğa çektiler, bundan soñ oña Qırımdan çıqışnı yasaq etken vesiqanı berdiler.

Meclis reisi Refat Çubarov mayıs 12-de yüz bergen vaqialarnı qırımtatarlarğa ücüm dep, adlandırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG