Link açıqlığı

Qırımda insan aqları bozuluvı aqqında malümat Putinge teslim etilecek – rusiyeli uquq qoruyıcı


Rusiye prezidenti yanındaki İnsan aqları boyunca Şuranıñ Qırım gruppası yarımadada insan aqları vaziyetini muzakere etti. Uquq qoruyıcılar muzakerelerniñ neticelerini Rusiye prezidenti Vladimir Putinge teslim etmege niyetleneler.

Bu aqta Qırım.Aqiqatqa bu gruppanıñ yolbaşçılarından biri olğan, rusiyeli uquq qoruyıcı Nikolay Svanidze bildirdi.

Onıñ sözlerine binaen, gruppa toplaşuvında muzakere etilgen esas mevzulardan biri «qırımtatar meselesi» oldı.

«Qırımtatarlarnıñ vaziyeti ağır. Bu vaziyet eyileşmey, aksine, daa yaramay ola. Qırımtatarlarnıñ esas organı olğan Meclis ekstremistik olaraq tanıldı. Bütün bu malümat prezidentke haber etilecek», – dep ilân etti Svanidze.

Uquq qoruyıcılar Qırım mühbirlerinde keçirilgen tintüvler mevzusını da muzakere etti.

Svanidzeniñ bildirgenine köre, Vladimir Putinge Qırımda insan aqları bozuluvı boyunca malümat bir afta içinde haber etilecektir.

Qırımda iş ziyaretinen Rusiye ombudsmeni Tatyana Moskalkova buluna. Bundan evel o Qırımtatar Milliy Meclisiniñ temsilcileri ile körüşkeni aqqında bildirile edi.

Ukrain ve halqara uquq qoruyıcı teşkilâtları Qırım Rusiye tarafından işğal etilgen soñ yarımadada insan aqları bozulğanı aqqında ilân ete edi. Rusiye ükümeti tarafından eñ büyük basqın qırımtatarlar ve yarımadada yaşağan ukrain tarafını tutqanlarğa qarşı yapıla.

Rusiyege boysunğan Qırım ükümeti uquq qoruyıcılarnıñ yarımadada insan aqları bozulması aqqında malümat qabartılğan, dep ayta.

Mayıs 12-de Avropa Parlamentinde Rusiye tarafından işğal etilgen Qırımda qırımtatarlarnıñ aq-uquqları bozulması meselesi muzakere etilecek.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG