Ukrainanı «Eurovision-2016» halqara yır yarışında temsil etken yırcı Jamala bu icadiy yarışta eñ büyük raqibi özü olğanını tüşüne.
Bunı o Stockholmde Qırım.Aqiqatqa ayttı.
«Sanada eñ büyük raqibim men olğanımnı tüşünem, çünki yırım pek duyğulı. Mında eşitecegimiz diger yırlarnıñ muzıkasından ve manasından farqlı», – dedi yırcı.
İcadım, sözüm insanlarğa tiygenini añlasam, ğalebe olacaqJamala
Onıñ aytqanına köre, dünya sevgi ve barışıq içinde yaşamaq çağıruvlarına muhtac.
«Eurovisionnı» seyir etecek er avropalınıñ yüreginde bir iz qaldırmaq isteyim. İcadım, sözüm insanlarğa tiygenini añlasam, ğalebe olacaq», – dep ayttı Jamala.
«Bu sene yarış er şeyni kösterecek, bu bir şou olsa, insan «X» ğalip çıqacaq, amma bir yır yarışı olsa – «1944» yırı ğalebe qazanacaq», – dep tüşüne yırcı.
«Eurovision-2016» yarışınıñ yarım finalı mayıs 10-da İsveçiyanıñ paytahtı Stockholm sanasında olıp keçti. Yarışnıñ finalı mayıs 14-te keçirilecek.
61-inci «Eurovision» yır yarışında 42 memleket iştirak etecek.
Ukrainanı yarışta qırımtatarı Jamala qırımtatar sürgünligini añlatqan «1944» yırı ile temsil ete.
