Link açıqlığı

Qırım Müftiyatında Meclisniñ Çadırdağ seferini boykot etmek çağıruvını takbih ettiler


Qırımda Çatırdağ seferi, sürgünlik qurbanlarınıñ hatırasına, 2015

Qırım musulmanları müftisiniñ muavini Ayder İsmailov vatandaşlarnı Çatırdağda keçirilecek sürgünlik qurbanları hatırasına bağışlanğan dua merasiminde iştirak etmemege çağırmaq olmaz, dep ilân etti.

Böyle etip, QAMDİ-de Meclisniñ qırımtatarlarnı merasimni boykot etmek çağıruvına izaat berdiler.

«Bu endi qabartma sayılır. Böyle devam etse, bazı siyasetçiler cuma namazına barmañız, Qurban bayram ve Ramazan bayramını qayd etmeñiz derler. Aqılğa uyğan bir şey olğanını tüşünmeyim», – dep ayttı Ayder İsmailov Qırım.Aqiqatqa bergen izaatında.

Onıñ sözlerine binaen, Müftiyat Çatırdağ seferini teşkil etmek qararını qırımtatar gençler teşkilâtları muracaat etken soñ aldı.

Qırımtatar sürgünligi künü arfesinde Qırım Müftiyatı «Çatırdağ seferi» ananeviy aktsiyasınıñ keçirilmesi aqqında ilân etti. Buña cevap olaraq, Meclis reberleri vatandaşlarnı bu merasimni boykot etmege, ve böyleliknen Rusiyeniñ yarımadada areketlerine sessiz narazılıq bildirmege çağırdı.

Qırımtatarlar Çatırdağ seferini mayıs 18 arfesinde 2010 senesinden başlap teşkil ete. Bu dağ töpesi yarımadada eñ ükseklerden biri sayıla – 1527 metr. Bu yerge barıp çıqmaq içün küç kerek, ve bu merasimde esasen gençler iştirak ete edi. Başından bu aktsiyanı keçirmek teşebbüsini qırımtatar gençler teşkilâtları bildirdi, yıllar keçken soñ oña Meclis de qol tuttı.

Adet üzre, iştirakçiler dağ töpesine çıqıp, o yerde 1944 senesi sürgünlik qurbanlarını dua ile añğan edi, qırımtatar milliy gimnini icra etken edi. Çoqusı qırımtatar bayraqlarınen kele edi.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG