Link açıqlığı

Ukraina parlamenti qırımtatar genotsidi qurbanlarını tantanalı şekilde añma boyunca dünyağa muracaatnı azırlay


Mayıs 11-de, çarşenbe künü Ukraina Yuqarı Radası 1944 senesi qırımtatar genotsidi qurbanlarını tantanalı şekilde añma boyunca dünyağa muracaatnı baqmağa ve qabul etmege niyetlene.

İşbu mesele parlament toplaşuvınıñ kün mevzusına kirsetilgen.

Hususan, ukrain parlamentiniñ muracaatı Birleşken Milletler Teşkilâtı, Avropa parlamenti, Avropa Şurası Parlament Assambleyası, OSCE Parlament assambleyası, dünya liderleri ve halqara toplulıqnıñ bütün azaları adına yollanılacaq.

Bundan da ğayrı, muracaatta Rusiye Federatsiyası tarafından qırımtatar halqınıñ aqları ve serbestliginiñ bozulmasını takbih etmek çağıracaqlar.

2015 senesi noyabr 12-de Ukraina Yuqarı Radası 1944 senesi qırımtatar halqınıñ sürgünligini genotsid olaraq tanıdı.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG