Link açıqlığı

Ukraina Milliy Bankı qırımtatar halqı sürgünligine bağışlanğan hatıra parasını taqdim etti


Qırımtatar halqınıñ genotsidi qurbanlarınıñ hatırasına bağışlanğan para

Ukraina Milliy Bankı qırımtatar halqı sürgünliginiñ yıllığına bağışlanğan 10 nomenallı hatıra parası nasıl olacağını kösterdi. Mütenasip beyanat Ukraina Milliy Bankınıñ saytında peyda oldı.

«1944 senesi mayıs 18-de sovet nizamı vatan Qırımdan qırımtatarlarnı sürgün etmege başladı. Neticede sürgün etilgenlerniñ tahminen yarısı elâk oldı. Ukraina Milliy Bankı, Qırım Muhtar Cumhuriyeti ve Aqyar şeeri meseleleri boyunca Ukraina Devlet hızmetiniñ iştiraginen hatıra parasını işke tüşüre», – dep aytıla beynatta.

Paranıñ bir tarafında Ukraina tuğrası ve Qırım yarımadasınıñ haritası üstünde tamğa, aşada ise qırımtatar halqınıñ sürgünligini temsil etken tren köpçekleri kösterilgen.

Paranıñ diger tarafında ise, vagon içinde, sançqan telniñ arqasında sürgün etilgen qırımtatar qorantası ve «18.05.1944, qırımtatar halqınıñ genotsidi» yazısını körmek mümkün.

Mayıs 5-te Ukraina Nazirler kabineti qırımtatar halqınıñ sürgünligi matem kününe bağışlanğan merasimlerniñ planını tasdıqladı. Ukraina Medeniyet nazirliginiñ malümatına binaen, bütün merasimlerniñ keçirilmesi Qırımtatar Milliy Meclisi ile uyğunlaştırılğan.

Ukraina Haber siyaseti nazirligi 1944 senesi sürgünligi – qırımtatar halqınıñ genotsidiniñ yıllığına bağışlanğan «Mayıs 18-de epimiz – qırımtatarmız» kampaniyasını taqdim etti. Kampaniya-2016 «Genotsidni başımdan keçirdim» şiarınen keçirilecek.

Bundan da ğayrı, Qırımdaki vaqialarnı közetken ve vatanğa bağlı olğan qırımtatarlar yaşağan yerlerde, bu cümleden Türkiye, Almaniya, Kanada, Amerika ve Avropanıñ diger devletlerinde merasimlerniñ keçirilecegi aqqında bildirile.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG