Aqyarda mayıs 9-da, bazarertesi künü Ekinci cian cenkinde Almaniyağa qarşı ğalebeniñ 71 yıllığı qayd etile. Qırım.Aqiqat mühbiriniñ bildirgenine köre, Aqyarda bayram merasimleri çerçivesinde arbiy parad keçirildi.
Paraddan evel Kremlge boysunğan Aqyar akimiyetiniñ yolbaşçısı Sergey Menâylo ve Rusiye prezidentiniñ temsilcisi Oleg Belaventsev Aqyar mudafaası abidesindeki ebediy alev yanında gülçemberler qoydılar.
Parad merasiminde Aqyar garnizonınıñ rusiyeli ordusı, Sovet zabitleri birliginiñ veteranları, EPRON (Alelhusus suvaltı işler ekspeditsiyası – QA), Rusiye Qara deñiz birleşmeleri ve bölükleriniñ veteranları, «Ölmez polk» («Bessmertnıy polk») aktsiyasınıñ iştirakçileri ve «Gece qaşqırları» («Noçnıye volki») Moskva motoklubınıñ baykerleri iştirak ettiler.
Aqyar boyunca zemaneviy arbiy tehnika ve cenk vaqtından qalğan avtomobiller – piyade arbiy maşinaları, zırhlı naqliye, ağır top aletlerinen kolonna keçti.
Rusiye Qara deñiz flotu idaresiniñ malümatına binaen, parad merasiminde Rusiye Federatsiyasınıñ biñden ziyade arbiy hadimi iştirak etti.
Aqyar körfezinde «Rostov-na-Donu» suvastı gemisi, Rusiye Qara deñiz flotunıñ katerleri ve arbiy gemileri sırağa tizildi.
Parad bitken soñ Aqyar kommunistleri adet üzre veteranlarnı ve er istegen kişini arbiy aşlarından olğan qara boğday pastasınen sıyladı.
Aqşam Aqyarda bayram fişenki taqdim etilecek.
Mayıs 9 künü arifesinde Aqyar civarında Aqyar içün uruşında elâk olğan 98 şeer qoruyıcısınıñ cesetleri ğayrıdan defin etildi. Naaşnı qıdıruv taqımlarınıñ azaları tapqan.
Rusiyede ve Rusiye tarafından işğal etilgen Qırımda mayıs 9-da Ekinci cian cenkinde Almaniyanı yeñgeniniñ 71 yıllığını qayd eteler.
Ukrainada mayıs 9-da 1939-1945 seneleri Ekinci cian cenkinde natsizmni yeñilgen Ğalebe kününi qayd eteler. Bu hatıra kününi Ukraina Yuqarı Radası 2015 senesi aprel 9-da kommunizatsiyağa qarşı siyasetniñ ömürge keçirilmesi çerçivesinde tayinledi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
