Link açıqlığı

Saatnıñ esas haberi

İlmi Umerov QMDİ tarafından desteklengen Çatır Dağ seferinde iştirak etmemege çağırdı


Çatır Dağ seferi, 2015 senesi
Çatır Dağ seferi, 2015 senesi

Qırımda Rusiye qanunlarını qabul etmegen yarımada sakinleri mayıs 15-te Rusiyege boysunğan Muftiyat tarafından desteklengen Çatır Dağ seferinde iştirak etmemege qararını almalı. Bunı mayıs 9-da Qırımtatar Milliy Meclisiniñ reis muavini İlmi Umerov bildirdi.

«Muftiyat tarafından teşkil etilgen Çatır Dağ seferinde iştirak etmek meselesi faal şekilde muzakere etile. Menim fikrim böyledir: añlı, duşmanlarnen işbirlik ne olğanını añlağan ve Qırımda Rusiye qanunlarını qabul etmegen insanlar 2016 seferinde iştirak etmemek qararını almalı... İşğal bitken soñ, repressiyalar toqtatılğan soñ, biz mıtlaqa ananeviy olğan, yahşı merasimlerni, Matem künü (mayıs 18) ve Bayraq kününi ğayrıdan teşkil etecekmiz... Şimdi ise, işğalci ükümetke ve olarnen iş tutqanlarğa qarşı münasebetni bildirmek kerek», – yazdı Umerov Facebook saifesinde.

Rusiyege boysunğan Qırım ve Sevastopol şeeri musulmanları diniy idaresiniñ matbuat hızmeti mayıs 15-te Qırımda qırımtatar sürgünliginiñ 72 yıllığına bağışlanğan «Çatır Dağ seferi» aktisyası teşkil etilecegi aqqında ilân etti.

Bildirilgen malümatqa binaen, aktsiya QMDİ, qırımtatar cemaat ve yaşlar teşkilâtları tarafından teşkil etile. «Er sene keçirilgen merasim çerçivesinde yaşlar Qırım timsallerinden biri olğan Çatır Dağ seferine yol alacaq. Bu yerde iştirakçiler sürgünlik qurbanlarınıñ ruhuna dua etecek, milliy bayraqnı tikleycek ve milliy gimnni icra etecekler», – dep aytıla beyanatta.

Çatır Dağ seferi 1944 senesi sürgünlik qurbanlarını añmaq maqsadınen 2010 senesinden başlap, qırımtatarlar tarafından er sene teşkil etilgen ananeviy aktsiya ola.

Teşkilâtçılardan biri işğal etilgen Qırımda yasaq etilgen Qırımtatar Milliy Meclisi olğan.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG