Rusiyege boysunğan Qırım prokurorı Natalya Poklonskaya yaqında Qırımda yüz bergen yaqalanuvlar «profilaktika reydleri» ile bağlı olğanını ve olarnıñ Ğalebe künü arifesinde havfsızlıq tedbirlerini teminlemek içün yapılğanını añlattı. Bu aqta o TASS agentligine bergen izaatta bildirdi.
«Er yerde reydler keçirilecek, er yerde köçüv qanunlarınıñ ömürge keçirilmesini teşkerecekmiz, vatandaşlar kütleviy şekilde toplaşqan yerlerde işler alıp barılacaq», – dedi o.
Natalya Poklonskayanıñ bildirgenine köre, «profilaktika reydlerinden» biri olğan Kezlev şeer bazarında cumaertesi künü yapılğan teşkerüv neticesinde köçüv qanunlarını bozğan sekiz Özbekistan vatandaşı tutuldı. O, şimdiki vaqıtta olarnıñ Qırımdan çıqarılması meselesi muzakere etilgenini ayttı.
Natalya Poklonskaya onıñ hadimleri dinlerara saadaki aq-uquqlarnı bozmağanlarını qayd etti. Kütleviy haber vastalarnıda camilerde insanlarnıñ kütleviy şekilde yaqalanuvı aqqında malümatnı ihtikâr dep adlandırdı.
«Cami, kilse ve diger diniy müessiselerge uquq qoruyıcılar kirmey. Bütün bu malümat yalan ve ihtikârdır», – dep ilân etti Poklonskaya.
Mayıs 7-de mühbir Osman Paşayev Kezlev merkez bazarında rusiyeli uquq qoruyıcılar 25 qırımtatarnı tutqanını bildirdi. Onıñ sözlerine köre, uquq qoruyıcılar yaqalanuvlar Krasnodarda bir qorantanı öldürgen şahıslarnı tutma operatsiyasınen bağlı olğanını añlattılar.
Adliyeci Emil Kurbedinov mayıs 6-da cuma namazından soñ Molodöjnoye köy camisinde 50-den ziyade uquq qoruyıcı yüz musulmannı tutıp, belli olmağan tarafqa alıp ketkenlerini bildirdi. Bundan soñ o, insanlar avtobuslardan azat etilgenini, amma olardan politsiya bölügine mustaqil şekilde kelmelerini talap etkenlerini bildirdi.
Bu mesele boyunca Qırımnıñ rusiyeli uquq qoruyıcı organlarınıñ resmiy izaatları yoq.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
