Qırım ve Sevastopol şeeri musulmanları diniy idaresinde (QMDİ) Rusiyege boysunğan Qırım uquq qoruyıcı organları Molodöjnoye köy camisi ziyaretçileriniñ vesiqalarını teşkergenlerini tasdıqladılar. Şimdiki vaqıtta QMDİ temsilcileri «yüz bergen vaqia boyunca meseleni baqıp çıqalar» ve «bu mesele boyunca resmiy beyanatnı» azırlaylar. Bunı Qırım.Aqiqatqa idareniñ matbuat hızmetinde bildirdiler.
«Uquq qoruyıcı organları öz areketlerini Muftiyatnen uyğunlaştırmay, olar plan boyunca teşkerüvlerge ketseler, bizni haberdar etmeyler», – dep qoştılar idareniñ matbuat hızmetinde.
Mayıs 6-da cuma namazından soñ Molodöjnoye köy camisinde 50-den ziyade silâlı insan musulmanlarnı yaqaladı.
Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.
Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
