Adliyeci Emil Kurbedinov, musulmanlarnı namazdan soñ belli olmağan tarafqa alıp ketken silâlı insanlarnıñ Qırım camisine «ziyareti» aqqında bildire.
«30-dan 50-ge qadar silâlı insan Aqmescit rayonındaki Molodöjnoye köyünde yerleşken camige cuma namazından soñ kelgeni aqqında malümat peyda oldı. Bildirilgen malümatqa köre, 100-den ziyade musulmannı belli olmağan tarafqa alıp keteler», – dep yazdı Kurbedinov Facebook saifesinde.
Diger tafsilâtlı malümatnı o bildirmey. Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.
Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
