Link açıqlığı

Smedlâyev: Qırımdaki rusiyeli mahkeme Çiygoznıñ apiste bulunma müddetiniñ uzattırılmasını lâğu etmek muracaatını qanaatlendirmedi


Qırımtatar Qurultayınıñ Merkeziy saylav komissiyasınıñ reisi Zair Smedlâyevniñ bildirgenine köre, Rusiyege boysunğan Aqmescitteki mahkeme toplaşuvınıñ neticelerine binaen, Qırımtatar Milliy Meclisiniñ reis muavini Ahtem Çiygoznıñ «fevral 26 işi» boyunca apiste bulunma müddetiniñ uzattırılmasını lâğu etmek imayeniñ muracaatı qanaatlendirilmeyip qaldı.

Smedlâyevniñ malümatına binaen, bu davanıñ diger qabaatlanğan adamı – Mustafa Degirmenci rusiyeli mahkemeden aynı red etüvni aldı.

«Aqmescitteki Kiyev rayon mahkemesi tarafından aprel 21-de qabul etilgen Mustafa Degirmenci, Ahtem Çiygoznıñ apiste bulunma müddetlerini uzattırmaq qararını lâğu etmek imayeniñ muracaatları qanaatlendirilmeyip qaldırıldı. Ali Asanovnıñ (bu iş boyunca qabaatlanğan daa bir kişi – QA) işi boyunca aynı qarar alınacaqtır», – bildirdi Smedlâyev.

Rusiye tarafından işğal etilgen Qırımda aprel 29-da Aqmescitteki Kiyev rayon mahkemesi Qırımtatar Milliy Meclisiniñ reis muavini Ahtem Çiygoznıñ apiste bulunma müddetini mayıs 22-ge qadar uzattırdı.

Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. 2016 senesi fevral ayında rusiyeli Qırım Yuqarı mahkemesiniñ toplaşuvında bu işni tekrar taqiq etilmesine yollamağa qarar alındı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG